കൊച്ചി: നിർമ്മിത ബുദ്ധിയുടെ അനന്തസാധ്യതകൾ പരമാവധി പ്രയോജനപ്പെടുത്തുന്നതോടൊപ്പം അതിലെ ചതിക്കുഴികളെ കുറിച്ച് ഉപഭോക്താക്കൾ ബോധവാന്മാരാകണമെന്ന് സംസ്ഥാന ഉപഭോക്തൃ തർക്കപരിഹാര കമ്മിഷൻ പ്രസിഡന്റ് ജസ്റ്റിസ് കെ. സുരേന്ദ്രമോഹൻ പറഞ്ഞു.
ലോക ഉപഭോക്തൃ അവകാശ ദിനാചരണത്തോടനുബന്ധിച്ച് ഉപഭോക്തൃ കോടതി സമുച്ചയത്തിൽ പൊതുവിതരണ ഉപഭോക്തൃ കാര്യവകുപ്പ്, ജില്ലാ ഉപഭോക്തൃ തർക്ക പരിഹാര കമ്മിഷനും സംയുക്തമായി സംഘടിപ്പിച്ച ബോധവത്കരണ സെമിനാർ ഉദ്ഘാടനം ചെയ്യുകയായിരുന്നു അദ്ദേഹം.
ഉപഭോക്തൃ കോടതിയിൽ കെട്ടിക്കിടക്കുന്ന കേസുകൾ സമയബന്ധിതമായി തീർപ്പാക്കുന്നതിന് ഓൺലൈൻ സംവിധാനം ഏറെ സഹായകമാണെന്നും അദ്ദേഹം പറഞ്ഞു. ഉദ്യോഗസ്ഥരായ നവീൻ വിജയ്, ടി.എ. ശ്രീലേഖ എന്നിവരെ അനുമോദിച്ചു. അഡ്വ. ജി. കിരൺ , അഡ്വ.ജെ.സൂര്യ എന്നിവരുടെ നേതൃത്വത്തിൽ ബോധവത്കരണ ക്ലാസുകളും കോളേജ് വിദ്യാർത്ഥികൾക്കായി ക്വിസ് മത്സരവും സംഘടിപ്പിച്ചു. ജില്ല ഉപഭോക്തൃ തർക്ക പരിഹാര കമ്മിഷൻ പ്രസിഡന്റ് ഡി.ബി. ബിനു അദ്ധ്യക്ഷത വഹിച്ചു. സംസ്ഥാന ഉപഭോക്തൃ തർക്കപരിഹാര കമ്മിഷൻ മെമ്പർ കെ.ആർ. രാധാകൃഷ്ണൻ, ജില്ലാ സപ്ലൈ ഓഫീസർ പി.ആർ. ജയചന്ദ്രൻ, ജില്ലാ ഉപഭോക്തൃ തർക്കപരിഹാര കമ്മീഷൻ മെമ്പർമാരായ വൈക്കം രാമചന്ദ്രൻ, ടി.എൻ. ശ്രീവിദ്യ, ബാർ അസോസിയേഷൻ പ്രസിഡന്റ് ആർ. രാജരാജ വർമ, അസിസ്റ്റന്റ് രജിസ്ട്രാർ കെ.എച്ച്. അബ്ദുൽ അസീസ്, കേരള കൺസ്യൂമർ പ്രൊട്ടക്ഷൻ പ്രസിഡന്റ് പ്രിൻസ് തെക്കൻ, കൺസ്യൂമർ പ്രൊട്ടക്ഷൻ കൗൺസിൽ ജില്ലാ സെക്രട്ടറി ജെസി, സംസ്ഥാന ഉപഭോക്ത സംരക്ഷണ സമിതി മെമ്പർ അനിത സുനിൽകുമാർ തുടങ്ങിയവർ സംസാരിച്ചു.