കൊച്ചി: ഡോ. കെ.കെ. ഗീതാകുമാരി ശ്രീശങ്കരാചാര്യ സംസ്‌കൃത സർവകലാശാല വൈസ് ചാൻസലറായി ചുമതലയേറ്റു. കാലിക്കറ്റ് സർവകലാശാല സംസ്‌കൃത വിഭാഗം പ്രൊഫസറായി സേവനമനുഷ്ഠിച്ച് വരികയായിരുന്നു. കാലടി മുഖ്യകേന്ദ്രത്തിലെ ഭരണനിർവഹണ സമുച്ചയത്തിൽ രജിസ്ട്രാർ ഡോ. പി. ഉണ്ണിക്കൃഷ്ണൻ ബൊക്കെനൽകി സ്വീകരിച്ചു. ഫിനാൻസ് ഓഫീസർ എസ്. ശ്രീകാന്ത് സന്നിഹിതനായിരുന്നു.
30 വർഷത്തെ ബിരുദാനന്തരബിരുദ അദ്ധ്യാപന പരിചയമുണ്ട്. സംസ്‌കൃതസർവകലാശാലയിൽനിന്ന് സംസ്‌കൃതത്തിൽ ഡോക്ടറേറ്റ് നേടി. സംസ്‌കൃതം സാഹിത്യം, സംസ്‌കൃതം വ്യാകരണം, പുരാണേതിഹാസം, ഇംഗ്ലീഷ്, ഫിലോസഫി, ഭാഷാശാസ്ത്രം എന്നിവയിൽ ബിരുദാനന്തര ബിരുദവും ബി.എഡ്, എം. ഫിൽ, ഡിപ്ലോമ ഇൻ പ്രാകൃത് എന്നിവയും നേടിയിട്ടുണ്ട്. കാലിക്കറ്റ്, കണ്ണൂർ, കേരള സർവകലാശാലകളിൽ ഡോക്ടറൽ കമ്മിറ്റി ചെയർമാനായിരുന്നു. കാലിക്കറ്റ് സർവകലാശാലയുടെ ഫാക്കൽറ്റി ഒഫ് ലാംഗ്വേജ് ആൻഡ് ലിറ്ററേച്ചർ വിഭാഗം ഡീനായും സേവനമനുഷ്ഠിച്ചിട്ടുണ്ട്. തൃശൂർ കുന്നത്തങ്ങാടി സ്വദേശിനിയാണ്.