പീരുമേട്: അകാലത്തിൽ വേർപ്പെട്ട ചിത്രകാരൻ അജി തോമസിന്റെ കുടുംബത്തിന് കെ.എസ്.ആർ.ടി.സി എംപ്ലോയീസ് അസോസിയേഷൻ (സി.ഐ.ടി.യു) സംസ്ഥാനകമ്മിറ്റി വീട് നിർമ്മിച്ച് നൽകും. കെ.എസ്.ആർ.ടി.സി തൊഴിലാളികൾ മാസം തോറും 100 രൂപവീതം പിരിച്ചെടുത്ത തുക കൊണ്ട് നിർമ്മിക്കുന്ന രണ്ട് വീടുകളിലൊന്നാണ് അജി തോമസിന് നൽകുന്നത്. സി.ഐ.ടി.യു സാന്ത്വന സ്പർശം പദ്ധതിയുടെ ഭാഗമായി ആനത്തലവട്ടം ആനന്ദന്റെ സ്മരണയ്ക്കായാണ് വീട് നിർമ്മിച്ചു നൽകുന്നത്. സി.ഐ.ടി.യു സംസ്ഥാന പ്രസിഡന്റും മുൻ തൊഴിൽ മന്ത്രിയുമായ ടി.പി. രാമകൃഷ്ണൻ ശിലാസ്ഥാപനം നിർവ്വഹിച്ചു. തുടർന്ന് പീരുമേട് ടൗണിൽ ചേർന്ന പൊതുസമ്മേളനം ടി.പി. രാമകൃഷ്ണൻ എം.എൽ.എ ഉദ്ഘാടനം ചെയ്തു. വാഴൂർ സോമൻ എം.എൽ.എ, സി.ഐ.ടി.യു. ജില്ലാ പ്രസിഡന്റ് ആർ. തിലകൻ, സെക്രട്ടറി കെ.എസ്. മോഹനൻ, കെ.എസ്.ആർ.ടി.സി അസോസിയേഷൻ സംസ്ഥാന ജനറൽ സെക്രട്ടറി ഹണി ബാലകൃഷ്ണൻ, വി.എസ്. പ്രസന്നൻ എന്നിവർ സംസാരിച്ചു. പീരുമേട് പഞ്ചായത്ത് പ്രസിഡന്റ് ആർ. ദിനേശൻ അദ്ധ്യക്ഷനായിരുന്നു. അസോസിയേഷൻ നേതാക്കളായ ഹരികൃഷ്ണൻ, സി.ആർ. മുരളി, ജോജോ, സി.പി.എം പീരുമേട് ഏരിയാ സെക്രട്ടറി എസ്. സാബു, സി.ഐ.ടി.യു ജില്ലാ വൈസ് പ്രസിഡന്റ് ജി. വിജയാനന്ദ്, വണ്ടിപ്പെരിയാർ പഞ്ചായത്ത് പ്രസിസന്റ് കെ.എം. ഉഷ, അജി തോമസിന്റെ ഭാര്യ ലിന്റാ അജി, മക്കളായ അലിൻ, അലീന എന്നിവരും ചടങ്ങിൽ പങ്കെടുത്തു.