ഇടുക്കി: പൾസ് പോളിയോ ഇമ്മ്യൂണൈസേഷന്റെ ഭാഗമായ തുള്ളിമരുന്ന് വിതരണം ജില്ലയിലെമ്പാടും ഇന്ന് നടക്കും. ജില്ലാതല ഉദ്ഘാടനം ഇടുക്കി മെഡിക്കൽ കോളേജിൽ രാവിലെ എട്ടിന് മന്ത്രി റോഷി അഗസ്റ്റിൻ നിർവഹിക്കും.

അഞ്ച് വയസിൽ താഴെയുള്ള കുഞ്ഞുങ്ങൾക്കാണ് പോളിയോ തുള്ളിമരുന്ന് നൽകുന്നത്. അഞ്ചു വയസ്സിൽ താഴെ പ്രായമുള്ള എല്ലാ കുഞ്ഞുങ്ങൾക്കും ഓരോ ഡോസ് പോളിയോ വാക്‌സിൻ നൽകുന്നതിന് 1021 വാക്‌സിനേഷൻ ബൂത്തുകൾ ജില്ലയിൽ സജ്ജീകരിച്ചിട്ടുണ്ട്.
കുട്ടികൾക്ക് അംഗവൈകല്യത്തിന് കാരണമാകുന്ന രോഗമാണ് പോളിയോ മൈലൈറ്റിസ് അഥവാ പോളിയോ രോഗം.

ജില്ലയിൽ ഇന്ന് തിരഞ്ഞെടുക്കപ്പെട്ട ബൂത്തുകളിൽ രാവിലെ 8 മുതൽ വൈകിട്ട് 5 വരെ കുഞ്ഞുങ്ങൾക്ക് പോളിയോ വാക്‌സിൻ നൽകും. ഇന്ന് ലഭിക്കാത്തവർക്ക് 4, 5 തീയതികളിൽ ഭവനസന്ദർശനത്തിലൂടെ വാക്‌സിൻ നൽകും. 69092 കുഞ്ഞുങ്ങൾക്ക് വാക്‌സിൻ ലഭ്യമാക്കുകയാണ് പരിപാടിയുടെ ലക്ഷ്യം. വാക്‌സിനേഷന്റെ സുഗമമായ നടത്തിപ്പിനായി 21 ട്രാൻസിസ്റ്റ് ബൂത്തുകളും 27 മൊബൈൽ ടീമുകളെയും നിയോഗിച്ചിട്ടുണ്ട്. പ്രവർത്തനങ്ങൾ വിലയിരുത്തുന്നതിനായി 120 സൂപ്പർ വൈസർമാരെയും നിയോഗിച്ചിട്ടുണ്ട്.