രാജാക്കാട്: ഒരിടവേളയ്ക്ക് ശേഷം പന്നിയാറിൽ കാട്ടാന വീണ്ടും ആക്രമണം തുടങ്ങി. പന്നിയാർ എസ്റ്റേറ്റിലെ കെട്ടിടത്തിൽ പ്രവർത്തിക്കുന്ന ചുണ്ടൽ സ്വദേശി ആന്റണിയുടെ റേഷൻ കടയാണ് ചക്കക്കൊമ്പൻ എന്ന ഒറ്റയാൻ തകർത്തത്. കുപ്രസിദ്ധനായ അരിക്കൊമ്പൻ സ്ഥിരമായി ഈ റേഷൻ കട തകർത്ത് അരിയും പഞ്ചസാരയും ഭക്ഷിച്ചിരുന്നത് 17 തവണയാണ് . അരിക്കൊമ്പനെനാടുകടത്തിയ ശേഷം ഈ കെട്ടിടം പുനർനിർമ്മിച്ച് സുരക്ഷിതത്തിനായി ഫെൻസിങ്ങും സ്ഥാപിച്ചിരുന്നു. എന്നാൽ ഇന്നലെ പുലർച്ചെ 3 മണിയോടെ സമീപത്തുണ്ടായിരുന്ന കൊടിമരം പിഴുതെടുത്ത് ഫെൻസിങ് തകർത്താണ് പുതുക്കി നിർമ്മിച്ച റേഷൻ കടയിലും ചക്കക്കൊമ്പൻ പരിപാടി അരങ്ങേറിയത്. കെട്ടിടത്തിന്റെ ഭിത്തി പൊളിച്ചടുക്കിയ ശേഷം അരിച്ചാക്കുകൾ പുറത്തേക്കെടുത്തിടുകയും ഇതിൽ കുറെ അരിഭക്ഷിക്കുകയും ചെയ്തു. ചിന്നക്കനാൽ, 301 കോളനി, സിങ്കു കണ്ടം, ആനയിറങ്കൽ, പന്നിയാർ തുടങ്ങിയ സ്ഥലങ്ങളിൽ കാട്ടാന ശല്യം തുടർക്കഥയാകുന്നത് ആശങ്കയോടെയാണ് ജനങ്ങൾ വീക്ഷിക്കുന്നത്.