കാമാക്ഷി: പാറക്കടവ് അന്നപൂർണ്ണേശ്വരി ദേവീക്ഷേത്രത്തിൽ മീനപ്പൂര മഹോത്സവവും ആറാമത് പുനഃപ്രതിഷ്‌ഠാ വാർഷികവും 19 മുതൽ 23 വരെ നടക്കും. ക്ഷേത്രം തന്ത്രി സുരേഷ് ശ്രീധരൻ തന്ത്രികളും ക്ഷേത്രം മേൽശാന്തി പ്രതീഷ് ശാന്തികളും ചടങ്ങുകൾക്ക് മുഖ്യകാർമ്മികത്വം വഹിക്കും. എല്ലാ ദിവസവും രാവിലെ അഞ്ചിന് പള്ളിയുണർത്തൽ, 5.30ന് നിർമ്മാല്യദർശനം, ഗണപതി ഹോമം, ആറിന് ഉഷപൂജ, 10ന് ഉച്ചപൂജ, വൈകിട്ട് 6.30ന് ദീപാരാധന, എട്ടിന് അത്താഴപൂജ എന്നിവ നടക്കും. 19ന് രാവിലെ പതിവ് പൂജകൾ, വൈകിട്ട് 5.15 ന് കൊടിക്കുറ ഘോഷയാത്ര, 6.45 നും 7.30 നും മദ്ധ്യേ ബ്രഹ്മശ്രീ സുരേഷ് ശ്രീധരൻ തന്ത്രികൾ തൃക്കൊടിയേറ്റും. എസ്.എൻ.ഡി.പി യോഗം മലനാട് യൂണിയൻ പ്രസിഡന്റ് ബിജു മാധവൻ , സെക്രട്ടറി വിനോദ് ഉത്തമൻ എന്നിവർ ഉത്സവ സന്ദേശം നൽകും. തുടർന്ന് കൊടിയേറ്റ് സദ്യ, വാഹനപൂജ, വാഹനപൂജ, കൊടിമരച്ചുവട്ടിൽ പറയെടുപ്പ്, കലവറ നിറയ്ക്കൽ. 20ന് രാവിലെ പതിവ് പൂജകൾ, ഏഴിന് എതൃത്ത് പൂജ, എട്ടിന് പന്തീരടി പൂജ, നവകം, പ‌ഞ്ചഗവ്യം, ശ്രീഭൂതബലി, 8.30ന് രുദ്രാഭിഷേകം, വൈകിട്ട് ഏഴിന് കാര്യസിദ്ധി പൂജ. 21ന് രാവിലെ പതിവ് പൂജകൾ, എട്ടിന് പന്തീരടി പൂജ, കലശപൂജ, കലശാഭിഷേകം, ശ്രീഭൂതബലി, ഒമ്പതിന് ശനീശ്വര പൂജ, വൈകിട്ട് ഏഴിന് ആയില്യപൂജ, അത്താഴപൂജ, ശ്രീഭൂതബലി. 22ന് രാവിലെ പതിവ് പൂജകൾ, ഒമ്പതിന് പൊങ്കാല, 9.30 ന് ഉത്സവബലി, 11ന് പൊങ്കാല സമർപ്പണം, ഉത്സവബലിദർശനം, ഉച്ചപൂജ, പ്രസാദ ഊട്ട്, രാത്രി ഏഴിന് മെഗാതിരുവാതിര, തുടർന്ന് കലാസന്ധ്യ, അത്താഴപൂജ, ശ്രീഭൂതബലി, പള്ളിവേട്ടയ്ക്ക് എഴുന്നള്ളിപ്പ്, പള്ളിനിദ്ര. 23ന് രാവിലെ പതിവ് പൂജകൾ, വൈകിട്ട് 4.30ന് ആറാട്ട് ബലി, ആറാട്ട് പുറപ്പാട്, അഞ്ചിന് തിരുആറാട്ട്, ആറിന് താലപ്പൊലി കാവടി ഘോഷയാത്ര, 6.30ന് ആറാട്ട് എതിരേൽപ്പ്, ആറാട്ട് സദ്യ, കൊടിയിറക്ക്, മംഗളപൂജ, വലിയഗുരുതി, എട്ടിന് ആറാട്ട് സദ്യ.