മൂന്നാർ: മാട്ടുപ്പെട്ടിയിൽ വീണ്ടും പടയപ്പയുടെ പരാക്രമം, വഴിയോര കടകൾ തകർത്തു. കഴിഞ്ഞ ദിവസവും ആന മാട്ടുപ്പെട്ടിയിൽ എത്തിയിരുന്നു. വനംവകുപ്പ് പ്രദേശവാസികൾക്ക് ജാഗ്രതാ നിർദേശം നൽകിയിട്ടുണ്ട്
കഴിഞ്ഞ ദിവസം രാവിലെ മാട്ടുപ്പെട്ടിയിലെ ഇക്കോ പോയിന്റിൽ പടയപ്പയെത്തി കട ആക്രമിച്ചിരുന്നു. പുലർച്ചെ 6.30യോടെയാണ് സംഭവം. ഏറെ നേരം ജനവാസമേഖലയിൽ ആന പരിഭ്രാന്തി പരത്തി. ഇതിന് ശേഷം ആർആർടി സംഘമെത്തി കാട്ടിലേക്ക് തുരത്തി ഓടിച്ചെങ്കിലും വീണ്ടും രാത്രി തിരികെയെത്തി. രണ്ട് വഴിയോര കടകൾ തകർക്കുകയും ചെയ്തു, കരിക്ക്, പൈനാപ്പിൾ, കരിമ്പ് ഉൾപ്പെടെയുള്ളവ ആഹാരവുമാക്കി.നേരത്തെ മൂന്നാറിൽ ടൂറിസ്റ്റുകളുടെ കാറിന് നേരെ പടയപ്പ പാഞ്ഞടുത്തതും ഏറെ പരിഭ്രാന്തി പരത്തിയിരുന്നു. ആനയുടെ ആക്രമണത്തിൽ കാർ തകർന്നു. യാത്രക്കാർ ഇറങ്ങി ഓടിയതിനാൽ ആളപായമുണ്ടായില്ല. ഒരു മാസത്തിനുള്ളിൽ മാത്രമായി ഇത് ആറാം തവണയാണ് മൂന്നാറിൽ പടയപ്പയുടെ ആക്രമണമുണ്ടാകുന്നത്.