ഇടുക്കി: തങ്ങളുടെ പോളിംഗ് ബൂത്ത് കണ്ടുപിടിക്കുക ശ്രമകരമാന്നെന്ന് ചിലർക്കെങ്കിലും തോന്നുക സ്വാഭാവികം. ഈ സാഹചര്യത്തിലാണ് വോട്ടർമാർക്ക് തങ്ങളുടെ ബൂത്ത് ഏതാണ് എന്നറിയാനുള്ള എളുപ്പവഴി ഇലക്ഷൻ കമ്മിഷൻ ഒരുക്കുന്നത്. electoralsearch.eci.gov.in എന്ന വെബ്‌സൈറ്റിലൂടെ ഓരോ വോട്ടർമാർക്കും തൊട്ടടുത്തുള്ള ബൂത്തുകൾ കണ്ടെത്തി വോട്ട് ചെയ്യാനാകും. വെബ്‌സൈറ്റിൽ പ്രവേശിച്ച് പേര്, ജനനത്തീയതി, ജില്ല, നിയമസഭ മണ്ഡലം എന്നിങ്ങനെയുള്ള വിവരങ്ങൾ നൽകിയാൽ ബൂത്ത് ഏതെന്നു അറിയാനാകും. കൂടാതെ വോട്ടർ ഐഡി കാർഡ് നമ്പർ മാത്രം നൽകി സെർച്ച് ചെയ്ത് പോളിംഗ് ബൂത്ത് കണ്ടെത്തുന്നതിനുള്ള സംവിധാനവും വെബ്‌സൈറ്റിലുണ്ട്. വോട്ടർ ഐഡിക്കൊപ്പം രജിസ്റ്റർ ചെയ്തിട്ടുള്ള മൊബൈൽ നമ്പർ നൽകി ഒ.ടി.പി നൽകിയാലും വിവരം ലഭ്യമാകും. മൂന്ന് രീതിയിലൂടെയും പോളിംഗ് ബൂത്ത് കണ്ടെത്തുമ്പോഴും ഫലം ലഭിക്കാൻ സ്‌ക്രീനിൽ കാണിക്കുന്ന ക്യാപ്ച്ച കോഡ് കൃത്യമായി നൽകണം. പോളിംഗ് ബൂത്ത് കണ്ടെത്തിയാൽ ഗൂഗിൾ മാപ്പ് വഴി ബൂത്തിന്റെ ലൊക്കേഷൻ മനസിലാക്കാം. ആൻഡ്രോയ്ഡ്, ഐ.ഒ.എസ് പ്ലാറ്റ്‌ഫോമിൽ വരുന്ന വോട്ടർ ഹെല്പ് ലൈൻ ആപ്പ് വഴിയും ഹെൽപ്‌ലൈൻ നമ്പറായ 1950ൽ ബന്ധപ്പെട്ടാലും പോളിംഗ് ബൂത്ത് സംബന്ധിച്ച വിവരങ്ങൾ ലഭിക്കും.

അറിയാം സ്ഥാനാർത്ഥിയെ

ലോക്‌സഭ തെരഞ്ഞെടുപ്പിൽ മത്സരിക്കുന്ന സ്ഥാനാർത്ഥികളെക്കുറിച്ച് കൂടുതൽ അറിയാനുള്ള മൊബൈൽ ആപ്ലിക്കേഷനാണ് 'നോ യുവർ കാൻഡിഡേറ്റ് ' (കെ.വൈ.സി) ആപ്ലിക്കേഷൻ. അതത് മണ്ഡലങ്ങളിലെ സ്ഥാനാർത്ഥികൾ, നാമനിർദ്ദേശ പത്രിക സമർപ്പിക്കുന്ന സമയത്തെ അവരുടെ പശ്ചാത്തലം, സത്യവാങ്മൂലം എന്നിവ സംബന്ധിച്ച വിവരങ്ങൾ അറിയുന്നതിനായി വോട്ടർമാർക്ക് ഉപയോഗിക്കുന്ന ഉപഭോക്തൃ സൗഹൃദ മൊബൈൽ ആപ്പ് ആണ് കെ.വൈ.സി. വോട്ടർമാർക്ക് സ്ഥാനാർത്ഥികളുടെ പേരുകൾ ഉപയോഗിച്ച് ആപ്ലിക്കേഷനിൽ നിന്ന് വിവരങ്ങൾ മനസിലാക്കാനാകും. സ്ഥാനാർത്ഥികൾ ഉൾപ്പെട്ടിട്ടുള്ള ക്രിമിനൽ കേസുകളും കേസിന്റെ നിലവിലെ സ്ഥിതിയും ആപ്ലിക്കേഷനിലൂടെ അറിയാം. ആൻഡ്രോയിഡ്, ഐ.ഒ.എസ് പ്ലാറ്റ്‌ഫോമുകളിൽ ആപ്ലിക്കേഷൻ ഡൗൺലോഡ് ചെയ്യാൻ സാധിക്കും.