ഇടുക്കി: റവന്യൂ വകുപ്പിലെ 22 വർഷത്തെ സേവനത്തിനു ശേഷം ഇടുക്കി കളക്ട്രേറ്റിലെ ഡഫേദാർ പദവിയിൽ നിന്ന് കെ.എൻ. സാബു വിരമിക്കുന്നു. കളക്ടറേറ്റ് സന്ദർശിച്ചിട്ടുള്ള ആരും മറക്കാൻ സാധ്യതയില്ലാത്ത മുഖമാണ് സാബുവന്റേത്. ജില്ലാ കളക്ടറുടെ ചേംബറിൽ കളക്ടറുടെ ഏതാവശ്യത്തിനും സേവനസന്നദ്ധനായും സന്ദർശകരെ നിയന്ത്രിച്ചും കർമ്മനിരതനായി സാബുവിനെ എപ്പോഴും കാണാമായിരുന്നു. ഡഫേദാർ തസ്തികയിൽ 17 വർഷം തുടർച്ചയായി പ്രവർത്തിച്ചുകൊണ്ടാണ് സാബുവിന്റെ ഔദ്യോഗികജീവിതം അവസാനിക്കുന്നത്. ഇക്കാലയളവിൽ ജില്ല ഭരിച്ച 13 കളക്ടർമാരുടെ വിശ്വസ്തസേവകനായി പ്രവർത്തിക്കാൻ കഴിഞ്ഞത് ഭാഗ്യമായി കരുതുന്നുവെന്ന് അദ്ദേഹം അനുസ്മരിച്ചു. ബുധനാഴ്ച കളക്ട്രേറ്റ് കോൺഫറൻസ് ഹാളിൽ ചേർന്ന യാത്രയയപ്പ് യോഗത്തിൽ ജില്ലാ കളക്ടർ ഷീബാ ജോർജ്ജ് സാബുവിന് ഉപഹാരം സമ്മാനിച്ചു. ഡെപ്യൂട്ടി കളക്ടർമാരായ മനോജ് കെ, രാജു ഇ.എൻ, അനിൽ ഫിലിപ്പ്, ഡോ. അരുൺ ജെ.ഒ, ഫിനാൻസ് ഓഫീസർ ശ്രീജ എസ്, ജില്ലാ ലോ ഓഫീസർ രഘുറാം ജി, ഹുസൂർ ശിരസ്തദാർ ഷാ ജുമോൻ എം.ജെ, സീനിയർ സൂപ്രണ്ട് ബിനു ജോസഫ്, സ്റ്റാഫ് പ്രതിനിധികൾ എന്നിവർ സംസാരിച്ചു. ഇടുക്കി തടിയമ്പാട് കണിയാംകുടിയിൽ കുടുംബാംഗമാണ് സാബു. ഭാര്യ: ഷൈനി. മക്കൾ: അശ്വതി, അഞ്ജു. മരുമകൻ നിതിൻ.