നീലേശ്വരം:കച്ചെഗുഡ്ഢ -മംഗളൂരു 12789/12790 കച്ചെഗുഡ്ഢ എക്സ്പ്രസിന് നീലേശ്വരത്ത് സ്റ്റോപ്പ് അനുവദിച്ചു. സ്റ്റോപ്പ് പ്രാബല്യത്തിൽ വരുന്ന തീയതിയും സമയക്രമവും ഉടൻ തന്നെ ദക്ഷിണ റെയിൽവേ പുറപ്പെടുവിക്കും. ഉത്തര മലബാറിൽ നിന്ന് ഹൈദരാബാദിലേക്ക് ( കച്ചെഗുഡ്ഢ ) സർവീസ് നടത്തുന്ന ഏക ട്രെയിനാണ് ഇത്. നിലവിൽ ആഴ്ചയിൽ രണ്ട് ദിവസമാണ് സർവീസ്. ചൊവ്വ, വെള്ളി ദിവസങ്ങളിൽ കച്ചെഗുഡ്ഢയിൽ നിന്ന് രാവിലെ 6.05 ന് പുറപ്പെടുന്ന ട്രെയിൻ അടുത്ത ദിവസം രാവിലെ 7.10 ഓടെ നീലേശ്വരത്ത് എത്തും.

മടക്കയാത്രയിൽ ബുധൻ, ശനി ദിവസങ്ങളിൽ രാത്രി 08.05 ന് മംഗളൂരുവിൽ നിന്നും പുറപ്പെടുന്ന ട്രെയിൻ രാത്രി 9.15 ഓടെ നീലേശ്വരത്ത് എത്തും. രാത്രി മലബാർ എക്സ്പ്രസ്സ് പോയിക്കഴിഞ്ഞാൽ, ദീർഘനേരം, നീലേശ്വരത്ത് ട്രെയിൻ ഇല്ലാത്ത വിഷയം എൻ.ആർ.ഡി.സി റെയിൽവേ ബോർഡിന്റെ ശ്രദ്ധയിൽപ്പെടുത്തിയിരുന്നു. നീലേശ്വരത്തിന്റെ ടൂറിസവുമായി ബന്ധപെട്ട കാര്യങ്ങളും കത്തിൽ ഉൾക്കൊള്ളിച്ചിരുന്നു. ഈ നിവേദനത്തിന്റെ അടിസ്ഥാനത്തിലാണ് റെയിൽവേ താൽക്കാലികമായി സ്റ്റോപ്പ് അനുവദിക്കാൻ ഉത്തരവിട്ടത്. ഇന്റർസിറ്റിക്കും നേത്രാവതി എക്സ്പ്രസ്സിനും പിറകെ കച്ചെഗുഡ്ഢ എക്സ്പ്രസിനും സ്റ്റോപ്പ് ലഭിച്ചത്, യാത്രക്കാരുടെ എണ്ണത്തിലും വരുമാനത്തിലും കുതിച്ചു കയറുന്ന നീലേശ്വരത്തിന് ലഭിച്ച മറ്റൊരു അംഗീകാരം ആയി മാറി.