കണ്ണൂർ: ജില്ലയിലെ കടൽഭിത്തി നിർമ്മാണ പ്രവൃത്തികൾ അനാവശ്യമായി വൈകിപ്പിക്കുന്ന കരാറുകാർക്കെതിരെ നടപടി. ഇത്തരം പ്രവൃത്തികളിൽ വിട്ടുവീഴ്ചയുണ്ടാകില്ലെന്നും ഇതിനായി വകുപ്പുകൾ ഏകോപനത്തോടെ പ്രവർത്തിക്കണമെന്നും ജില്ലാ വികസന സമിതി യോഗത്തിൽ പുരാവസ്തു പുരാരേഖ വകുപ്പ് മന്ത്രി രാമചന്ദ്രൻ കടന്നപ്പള്ളി പറഞ്ഞു.

മാടായി, മാട്ടൂൽ കടൽഭിത്തി നിർമ്മാണം മന്ദഗതിയിലാണെന്ന എം വിജിൻ എം.എൽ.എയുടെ നിർദ്ദേശം പരിഗണിക്കവെയായിരുന്നു മന്ത്രിയുടെ പ്രതികരണം. മാടായിലെ കടൽഭിത്തി നിർമ്മാണം വിലയിരുത്താൻ കരാറുകാരനും ബന്ധപ്പെട്ട ഉദ്യോഗസ്ഥരും യോഗം ചേർന്നതായും പ്രവൃത്തി വേഗത്തിൽ പൂർത്തിയാക്കാൻ നിർദ്ദേശം നൽകിയതായും തലശ്ശേരി ഇറിഗേഷൻ സബ് ഡിവിഷൻ എക്സിക്യൂട്ടീവ് എൻജിനീയർ അറിയിച്ചു.
മാഹി പാലത്തിന്റെ അറ്റകുറ്റ പ്രവൃത്തിക്കായി അധികനിരക്കിൽ 23.37 ലക്ഷം രൂപക്ക് കരാർ സമർപ്പിച്ചിട്ടുണ്ടെന്നും ദേശീയപാത അതോറിറ്റി അംഗീകരിക്കുന്ന മുറക്ക് എഗ്രിമെന്റ് വച്ച് പ്രവൃത്തി തുടങ്ങുമെന്നും പൊതുമരാമത്ത് വകുപ്പ് അറിയിച്ചു. കേളകം, ഇരിട്ടി പ്രദേശങ്ങളിൽ ജനങ്ങളുടെ ജീവന് ഭീഷണിയായ വന്യമൃഗ ശല്യം പരിഹരിക്കാൻ പ്രദേശത്ത് ആർ.ആർ.ടി യൂണിറ്റ്, വിവിധ സെക്ഷനുകളിലെ ജീവനക്കാർ എന്നിവരെ ഉപയോഗിച്ച് രാത്രികാല പട്രോളിംഗ് ആരംഭിച്ചിട്ടുണ്ടെന്ന് കണ്ണൂർ ഡി.എഫ്.ഒ പറഞ്ഞു. കേളകം, കൊട്ടിയൂർ പഞ്ചായത്തുകളിലെ വന്യജീവി ശല്യം തടയാൻ ജില്ലാ മിനറൽ ഫൗണ്ടേഷൻ ഫണ്ട് ഉപയോഗിച്ച് 10 കിലോമീറ്റർ സോളാർ ഹാങ്ങിംഗ് ഫെൻസിംഗ് നിർമ്മിക്കാൻ 80 ലക്ഷം രൂപയുടെ പ്രപ്പോസൽ സമർപ്പിച്ചതായും അദ്ദേഹം അറിയിച്ചു.

കളക്ടറേറ്റ് ഓഡിറ്റോറിയത്തിൽ നടന്ന യോഗത്തിൽ കളക്ടർ അരുൺ കെ.വിജയൻ അദ്ധ്യക്ഷത വഹിച്ചു. മന്ത്രി രാമചന്ദ്രൻ കടന്നപ്പള്ളി, കെ.പി മോഹനൻ എം.എൽ.എ, ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത്, വിവിധ വകുപ്പ് തല ഉദ്യോഗസ്ഥർ തുടങ്ങിയവർ പങ്കെടുത്തു.

കർഷക‌രെ ഇനി

ഷോക്കടിപ്പിക്കില്ല

കാർഷികാവശ്യത്തിന് നേരത്തെ സൗജന്യമായി വൈദ്യുതി ലഭിച്ചിരുന്ന കർഷകരോട് ഇപ്പോൾ ബില്ല് അടക്കാൻ ആവശ്യപ്പെട്ട വിഷയം കൃഷി വകുപ്പ് ബില്ല് അടച്ച് പരിഹരിച്ചു. കാർഷികാവശ്യത്തിനുള്ള സൗജന്യ വൈദ്യുതി പദ്ധതിയിൽ 20 ലക്ഷം രൂപ കൂടി അനുവദിച്ചിട്ടുണ്ടെന്നും ഇത്തരത്തിൽ ആകെ ലഭിച്ച 35.96 ലക്ഷം രൂപയിൽ നിന്ന് 26.94 ലക്ഷം കെ.എസ്.ഇ.ബിക്ക് കൈമാറിയിട്ടുണ്ടെന്നും 7.21 ലക്ഷത്തിന്റെ ബില്ല് ട്രഷറിയിൽ സമർപ്പിച്ചിട്ടുണ്ടെന്നും കൃഷി വകുപ്പ് അറിയിച്ചു. ഇതോടെ 34.15 ലക്ഷം രൂപയാണ് കെ.എസ്.ഇ.ബിയിലേക്ക് നൽകിയത്.

പ്രീപെയ്ഡ് ഓട്ടോ സർവ്വീസ് ഉടൻ

തടസങ്ങൾ പരിഹരിച്ച് കണ്ണൂർ റെയിൽവേ സ്റ്റേഷനിൽ പ്രീപെയ്ഡ് ഓട്ടോ സർവ്വീസ് ഉടൻ ആരംഭിക്കാൻ ജില്ലാ കളക്ടർ അരുൺ കെ.വിജയൻ നിർദ്ദേശിച്ചു. നിരക്ക് ഉൾപ്പടെയുള്ള കാര്യത്തിൽ പ്രശ്നങ്ങൾ കണ്ടെത്തിയാൽ തുടർ യോഗങ്ങളിൽ പരിഹരിക്കാനും നിർദ്ദേശം നൽകി.