. കാഞ്ഞങ്ങാട്: മാണിക്കോത്ത് മാണിക്യമംഗലം പുന്നക്കാൽ ഭഗവതി ക്ഷേത്രത്തിൽ പുതുതായി അന്തിത്തിരിയൻ, വായിക്കരയച്ഛൻ എന്നീ സ്ഥാനങ്ങളിലേക്കുള്ള ആചാരം കൊള്ളൽ ചടങ്ങ് ഇന്ന് നടക്കും. അന്തിത്തിരിയനായി കൊളവയലിലെ ആക്കോടൻ ബാലകൃഷ്ണനും ആയിറ്റി ഭഗവതിയുടെ അച്ഛനായി നീലേശ്വരം തീർത്ഥങ്കരയിലെ വായിക്കര വിജയനും മൂന്നാം പൂരനാളായ ഇന്ന് വൈകിട്ട് 6 മണിക്ക് ശേഷമുള്ള മുഹൂർത്തത്തിൽ ആചാരംഏറ്റെടുക്കും. വെള്ളിക്കോത്ത് വാരിക്കാട്ട് ഇല്ലത്ത് വാരിക്കാട്ട് തന്ത്രിയുടെ കാർമികത്വത്തിലാണ് ചടങ്ങുകൾ. വാരിക്കാട്ട് എത്തി കലശം കുളിക്കുന്ന ഇരുവരെയും വാരിക്കാട്ട് തന്ത്രി ആചാരസ്ഥാനം വിളിച്ചുചൊല്ലും. ഇതിനു ശേഷം മടിയൻ കൂലോം ക്ഷേത്രപാലകേശ്വരനെ കണ്ട് വണങ്ങി മാണിക്കോത്ത് പുന്നക്കാൽ ഭഗവതി ക്ഷേത്രത്തിലെത്തും.