@ പദ്ധതി ഉദ്ഘാടനം മന്ത്രി മുഹമ്മദ് റിയാസ് നിർവഹിച്ചു

കോഴിക്കോട്: മലബാർ മിൽമ ഫാം ടൂറിസം രംഗത്തേക്കും ചുവടുവയ്ക്കുന്നു. പദ്ധതിയുടെ ഉദ്ഘാടനം കാലിക്കറ്റ് ടവറിൽ നടന്ന ചടങ്ങിൽ ടൂറിസം മന്ത്രി പി.എ. മുഹമ്മദ് റിയാസ് നിർവഹിച്ചു. ഗ്രാമീണ ടൂറിസത്തിന്റെ വികസനത്തിന് ഫാം ടൂറിസം ഏറെ സഹായകമാകുമെന്ന് മന്ത്രി​ പറഞ്ഞു.

മലബാർ മിൽമയുടെ സഹോദര സ്ഥാപനമായ മലബാർ റൂറൽ ഡെവലപ്മെന്റ് ഫൗണ്ടേഷൻ (എം.ആർ.ഡി.എഫ്) ആണ് പദ്ധതി നടപ്പാക്കുന്നത്.

ക്ഷീര മേഖലയുടെ പ്രവർത്തനം, ഗുണമേന്മയുള്ള പാൽ ഉത്പാദിപ്പിക്കുന്ന രീതി എന്നിവ സഞ്ചാരികളെ പരിചയപ്പെടുത്തി ക്ഷീരോത്പാദക മേഖലയിലേക്ക് കൂടുതൽ പേരെ ആകർഷിക്കുക എന്ന ലക്ഷ്യവും മിൽമ നടപ്പാക്കുന്ന ഫാം ടൂറിസം പദ്ധതിക്കുണ്ട്. മിൽമ ചെയർമാൻ കെ.എസ്.മണി അദ്ധ്യക്ഷത വഹിച്ചു. മലബാർ മിൽമ ക്ഷീര സംഘങ്ങൾക്കു നൽകുന്ന കെട്ടിട നവീകരണ ധനസഹായ വിതരണം തോട്ടത്തിൽ രവീന്ദ്രൻ എം.എൽ.എയും, ക്ഷീര സമാശ്വാസ ധനസഹായ വിതരണം ജില്ലാ പഞ്ചായത്ത് പ്രസിഡന്റ് ഷീജ ശശിയും, ഇൻഷ്വറൻസ് ധനസഹായ വിതരണം ജില്ലാ പഞ്ചായത്ത് വൈസ് പ്രസിഡന്റ് പി. ഗവാസും നിർവഹിച്ചു.

....................................................

മിൽമ നടപ്പാക്കുന്ന ഫാം ടൂറിസം പദ്ധതിക്ക് സംസ്ഥാന വിനോദ സഞ്ചാര വകുപ്പിന്റെ എല്ലാ പിന്തുണയും സഹായവും ഉറപ്പാക്കും.

മന്ത്രി പി.എ. മുഹമ്മദ് റിയാസ്

..........................................................

ഫാം ടൂറി​സം പാക്കേജ്

വയനാട് ജില്ലയിലെ മിൽമ ഡെയറി, ഡെയറി ഫാമുകൾ, വിനോദ സഞ്ചാര കേന്ദ്രങ്ങൾ എന്നിവ ഉൾക്കൊള്ളിച്ചുകൊണ്ടുള്ള പാക്കേജാണ് തുടക്കത്തിൽ നടപ്പാക്കുന്നത്. ഭക്ഷണം, താമസം, യാത്ര എന്നിവയുൾപ്പെടെ പ്രീമിയം, മോഡറേറ്റ്, മീഡിയം എന്നിങ്ങനെ മൂന്നു കാറ്റഗറികളിലുള്ള പാക്കേജുകളാണുണ്ടാകുക. വൈകാതെ സംസ്ഥാനത്തെ ഇതര ജില്ലകൾ കൂടി ഉൾപ്പെടുത്തിയുള്ള പാക്കേജുകൾ പ്രഖ്യാപിക്കും. ബുക്ക് ചെയ്യുന്നവരെ എയർപോർട്ട്, റെയിൽവേ സ്‌റ്റേഷൻ, നിശ്ചിത സെന്ററുകൾ എന്നിവിടങ്ങളി​ൽ നിന്ന് പിക്ക് ചെയ്യും.