കോട്ടയം : മാലിന്യമുക്ത നവകേരളം പരിപാടിയുടെ ശുചിത്വക്യാമ്പയിൻ ശിവരാത്രി ദിനമായ എട്ടിന് തുടങ്ങാൻ തീരുമാനിച്ചിരിക്കുന്നത് വിശ്വാസത്തെ വ്രണപ്പെടുത്തിയിരിക്കുകയാണെന്ന് ബി.ജെ.പി ജില്ലാ പ്രസിഡന്റ് ജി. ലിജിൻ ലാൽ ആരോപിച്ചു. മഹാത്മാഗാന്ധി ദേശീയ തൊഴിലുറപ്പ് പദ്ധതി പ്രകാരമുള്ള പുതിയ ക്യാമ്പയിൻ നാടെങ്ങും വ്രതാനുഷ്ഠാനത്തിലും ആഘോഷത്തിലും മുഴുകുന്ന ദിനത്തിൽ തന്നെ ആരംഭിക്കുന്നത് ആസൂത്രിതമാണ്. തൊഴിലുറപ്പ് പദ്ധതി അംഗങ്ങളായ ആയിരക്കണക്കിന് വനിതകൾ ശിവഭജനത്തിലും വ്രതത്തിലും മാത്രം കഴിയുന്ന ദിനമാണന്ന്. ആലുവ അടക്കമുള്ള പുണ്യക്ഷേത്രങ്ങളിൽ സകുടുബം ദർശനം നടത്തുന്ന ദിനവുമാണ് ശിവരാത്രി. ഇക്കാര്യങ്ങൾ വ്യക്തമായി അറിഞ്ഞാണ് ഇത്തരത്തിലുള്ള നിർദ്ദേശങ്ങൾ നൽകിയിട്ടുള്ളത്. ഹൈന്ദവരുടെ മതപരമായ ആഘോഷങ്ങൾ അട്ടിമറിക്കാനുള്ള സർക്കാർ മനോഭാവമാണ് അനാവൃതമാകുന്നതെന്നും അദ്ദേഹം പറഞ്ഞു.