പാലാ: പഞ്ചാക്ഷരീ മന്ത്രത്താൽ ചൈതന്യധന്യമായ പുണ്യദിനത്തിൽ നാടെങ്ങും മഹാശിവരാത്രി ആഘോഷിച്ചു. ശിവക്ഷേത്രങ്ങളിൽ വിശേഷാൽ പൂജകളും വഴിപാടുകളും നടന്നു.

പുലിയന്നൂർ മഹാദേവക്ഷേത്രത്തിലേക്ക് നടന്ന കാവടി ഘോഷയാത്ര വർണ്ണാഭമായി. കാവടിയഭിഷേകവും വിവിധ കലാപരിപാടികളും ശിവരാത്രി പൂജയും നടന്നു.

അന്തീനാട് മഹാദേവക്ഷേത്രത്തിൽ കാവടിയഭിഷേകത്തോടൊപ്പം ശിവരാത്രി പൂജയും നടന്നു.

തലനാട് ജ്ഞാനേശ്വര മഹാദേവക്ഷേത്രം, പൂവരണി മഹാദേവക്ഷേത്രം, വെള്ളിലാപ്പിള്ളി ശക്തീശ്വരം, കടപ്പാട്ടൂർ മഹാദേവക്ഷേത്രം, തൃക്കയിൽ ക്ഷേത്രം, പാലാ ളാലം മഹാദേവക്ഷേത്രം എന്നിവിടങ്ങളിലും വിശേഷാൽ പൂജകൾ, ശിവരാത്രി പൂജ, കാവടിഘോഷയാത്ര, താലപ്പൊലി എന്നിവയായിരുന്നു പ്രധാന ചടങ്ങുകൾ.

കൊടുമ്പിടി ഗുരുനാരായണ സേവാ നികേതൻ ട്രസ്റ്റിന്റെ ആഭിമുഖ്യത്തിൽ കൊടുമ്പിടി വിശ്രാന്തി നികേതനിൽ ശിവപ്രസാദം ശിവരാത്രി ആഘോഷം നടത്തി.. ഗുരുപൂജ, ശാന്തിഹവനം, മൃത്യുഞ്ജയ മന്ത്രാർച്ചന, ശിവസ്തുതികൾ എന്നിവ നടന്നു. ബ്രഹ്മചാരി സൂര്യശങ്കർ നേതൃത്വം നൽകി.

പൂവരണി മഹാദേവ ക്ഷേത്രത്തിൽ ശിവരാത്രി ആഘോഷത്തോടനുബന്ധിച്ച് അഖണ്ഡനാമജപം, പൂമൂടൽ, ശിവരാത്രിപൂജ എന്നിവയായിരുന്നു ചടങ്ങുകൾ.

ഏഴാച്ചേരി കാവിൻപുറം ഉമാമഹേശ്വര ക്ഷേത്രത്തിൽ നൃത്തവിദ്യാർത്ഥികളുടെ ചിലങ്കപൂജ, പ്രമുഖ നർത്തകി ഹെലൻ ആൻഡ്രുവിന്റെ മഹാദേവസ്തുതി നൃത്തം എന്നിവയും നടന്നു.

കുമ്മണ്ണൂർ നടയ്ക്കാംകുന്ന് ഭഗവതി ക്ഷേത്രം, വേഴാങ്ങാനം മഹാദേവക്ഷേത്രം എന്നിവിടങ്ങളിലും ശിവരാത്രി ആഘോഷിച്ചു.