കോട്ടയം: 2023-24 സാമ്പത്തിക വർഷത്തിൽ 16989 കോടി രൂപ ബാങ്കുകൾ കോട്ടയം ജില്ലയിൽ വായ്പ നൽകിയതായി ജില്ലാതല ബാങ്കിംഗ് അവലോകന സമിതി യോഗം അറിയിച്ചു. 6380 കോടി രൂപ കാർഷികമേഖലയിലും 2964 കോടി രൂപ സൂക്ഷ്മ, ചെറുകിട, ഇടത്തരം വ്യവസായമേഖലയിലും 424 കോടി രൂപ ഇതര മുൻഗണനാവയ്പാ മേഖലയിലും വിതരണം ചെയ്തു. വ്യക്തിഗത വായ്പ, വാഹനവായ്പ, സ്വർണവായ്പ മുതലായവ അടങ്ങുന്ന മുൻഗണനേതര വിഭാഗത്തിൽ 7220 കോടി രൂപയും വിതരണം ചെയ്തു. ആകെ വിതരണം ചെയ്ത വായ്പയിൽ 9768 കോടിരൂപയും മുൻഗണനാ വിഭാഗത്തിനാണ്.
ജില്ലയിൽ 297 കോടി രൂപ വിദ്യാഭ്യാസ വായ്പയായും, 1155 കോടി രൂപ ഭവന വായ്പയായും, 514 കോടി രൂപ മുദ്ര വായ്പവിഭാഗത്തിലും വിതരണം ചെയ്തിട്ടുണ്ട്. ജില്ലയിലെ ബാങ്കുകളുടെ മൊത്തം വായ്പാ നീക്കിയിരിപ്പ് 36484 കോടി രൂപയും നിക്ഷേപ നീക്കിയിരിപ്പ് 64375 കോടി രൂപയുമാണ്.
ജില്ലാ കളക്ടർ വി. വിഗ്‌നേശ്വരി യോഗം ഉദ്ഘാടനം ചെയ്തു. എസ്ബിഐ കോട്ടയം റീജണൽ മാനേജർ ജേക്കബ്. ഇ. ജോസഫ് അധ്യക്ഷത വഹിച്ചു.