മുണ്ടക്കയം : വേനൽ മഴയോട് ഒപ്പമെത്തിയ കാറ്റിൽ മലയോര മേഖലയിൽ വ്യാപക നാശം. വെള്ളിയാഴ്ച വൈകിട്ട് 5.30 ഓടെ ഉണ്ടായ ശക്തമായ കാറ്റിൽ വണ്ടൻപതാലിൽ നാലു വീടുകൾ തകർന്നു.10 സെന്റ് മേഖലയിലാണ് കൂടുതൽ നാശനഷ്ടം. പാടവീട്ടിൽ ഷാമോൻ, പാലപ്പറമ്പിൽ രാജു , കുളക്കാട്ടുതടം തങ്കമ്മ, തറപ്പേൽ സിനോജ് കുട്ടൻ എന്നിവരുടെ വീടുകളാണ് തകർന്നത്. വീടുകളുടെ മേൽക്കൂര കാറ്റിൽ പറന്ന് പോയി. പൂർണമായും തകർന്നതിനെ തുടർന്ന് വീടുകൾ വാസയോഗ്യമല്ലാതായി. നാല് കുടുംബങ്ങളെയും സമീപ വീടുകളിലാണ് പാർപ്പിച്ചിരിക്കുന്നത്. നിരവധി മരങ്ങളും ഒടിഞ്ഞ് വീണ് വൈദ്യുതി ബന്ധവും നിലച്ചു. കൃഷിയിടങ്ങളിലും നാശം സംഭവിച്ചു. വാർഡ് മെമ്പർ ഫൈസൽ മോൻ, എരുമേലി വടക്ക് വില്ലേജ് ഓഫീസർ സന്ധ്യ, നിയാസ് കല്ലുപുരക്കൽ, വിപിൻ വിശ്വനാഥൻ തുടങ്ങിയവർ നാശനഷ്ടങ്ങൾ വിലയിരുത്തി.