കോട്ടയം : തണ്ണീർമുക്കം ബണ്ട് അടച്ചെങ്കിലും അടയ്ക്കാത്തതുപോലെ. താഴ്ത്തിയ ഷട്ടറിനടിയിൽ കല്ല് വച്ചതോടെ വേമ്പനാട്ടുകായലിൽ ഉപ്പിന്റെ അംശം കൂടി. ഇതാവട്ടെ നെൽകർഷകരെ ആശങ്കയിലാഴ്ത്തുന്നു. ഉപ്പിന്റെ അളവ് 2.4 പി.പി.ടി ആയെന്നാണ് കായൽ ഗവേഷണ കേന്ദ്രം പരിശോധനയിൽ കണ്ടെത്തിയത്. കൊയ്തു പാതിയായ കുട്ടനാട്ടിലും അപ്പർകുട്ടനാട്ടിലും നെല്ലിനെ ഇത് ദോഷകരമായി ബാധിക്കുമെന്ന ഭീതിയിലാണ് കർഷകർ.മത്സ്യ ബന്ധനത്തിന് മെച്ചമാകുമെന്നതിനാൽ ഷട്ടറുകൾക്ക് അടിയിൽ കല്ല് വച്ചത് വലിയ അളവിൽ ജലം ഒഴുകിപ്പോകാൻ കാരണമായി.

ഇത് കായൽ ജലത്തിന്റെ അളവ് കുറച്ചു. കടുത്ത വേനൽ ചൂടിൽ വറ്റിവരണ്ട് വേമ്പനാട് കായൽ തീരങ്ങൾ കരിഞ്ഞനിലയിലാണ്.ഉപ്പിന്റെ അളവ് വേമ്പനാട്ടുകായലിൽ കൂടിയത് നെൽകൃഷിയെ നശിപ്പിക്കാൻ സാദ്ധ്യതയുണ്ട്. കൊയ്ത്ത് പൂർത്തിയാകാത്തതിനാൽ വരൾച്ച കണക്കാക്കി തണ്ണീർമുക്കം ബണ്ട് തുറക്കാൻ സാധിക്കില്ല. കായൽ ഗവേഷകരോട് കൃത്യമായ വിവരശേഖരണം നടത്താതെ ഓൺലൈൻ മീറ്റിംഗ് മാത്രം നടത്തി വൃശ്ചിക വേലിയേറ്റം നടക്കുന്നതിന് മുൻപായി തണ്ണീർമുക്കം ബണ്ട് അടച്ചതിലെ അപാകതയാണ് കായൽ വറ്റിവളരാൻ കാരണമെന്ന് കായൽ ഗവേഷണകേന്ദ്രം ഡയറക്ടർ ഡോ. കെ.ജി പദ്മകുമാർ വ്യക്തമാക്കി. ഉപ്പുവെള്ളം സമീപ ആറുകളിലും തോടുകളിലും എത്താതിരിക്കാൻ ബണ്ട് തുറക്കും മുമ്പ് താത്ക്കാലിക തടയണകൾ എല്ലാ വർഷവും നിർമ്മിക്കാറുള്ളതാണ്.

തടയണ നിർമ്മാണത്തിനു മുമ്പേ ഉപ്പുവെള്ളമെത്തുന്നത് കുടിവെള്ള വിതരണത്തെയും ബാധിച്ചേക്കും. കായലിൽ ഒഴുക്കില്ലാതായതോടെ കുളവാഴയും പോളയും നിറഞ്ഞത് ജലജീവികളുടെ ആവാസ വ്യവസ്ഥ തകർത്തു. താറാവുകൾ, കൊക്കുകൾ, ഇരണ്ട തുടങ്ങി ജലാശയത്തെ ആശ്രയിച്ചു ജീവിക്കുന്ന പക്ഷികൾക്ക് പോലും ഇറങ്ങാൻ കഴിയാത്ത രീതിയിൽ കുളവാഴ പെരുകി. തോടുകളിൽ എക്കൽ നിറഞ്ഞു. വെളളം വറ്റിയ തോടുകളിൽ തീരെ ആഴം ഇല്ല. പാടശേഖരങ്ങളിൽ വെള്ളം കയറ്റിയാൽ തോടുകളിൽ നിലവിലെ ജലനിരപ്പും താഴും. ജലമാർഗം യാത്ര ചെയ്താൽ മാത്രം പുറംലോകവുമായി ബന്ധപ്പെടാൻ കഴിയുന്ന നിരവധി കായൽ ഗ്രാമങ്ങളും വട്ടത്തുരുത്തുകളും ഇവിടെയുണ്ട്.

ജലാശയങ്ങളെ സംരക്ഷിക്കാൻ അടിയന്തര നടപടികൾ അധികൃതർ കൈക്കൊള്ളണമെന്ന് ഡോ.പത്മകുമാർ ചൂണ്ടിക്കാട്ടി തോടുകളിൽ അടിഞ്ഞു കൂടിയ കുളവാഴ ഇല്ലാതാക്കാൻ കുളവാഴ കാലിത്തീറ്റ പദ്ധതി ഗുണകരമാകുമെന്ന് സീനിയർ വെറ്ററിനറി സർജൻ ഡോ.പി.ബിജു അഭിപ്രായപ്പെട്ടു. . കാലിത്തീറ്റയ്ക്ക് ക്ഷാമം നേരിടുന്ന സാഹചര്യത്തിൽ തദ്ദേശസ്വയംഭരണ സംവിധാനങ്ങൾ കുളവാഴ കാലിത്തീറ്റ പദ്ധതി നടപ്പിലാക്കിയാൽ കുറഞ്ഞ ചിലവിൽ ജലാശയങ്ങളിലെ പോള നീക്കം ചെയ്യാൻ സാധിക്കും.