നമ്മുടെ നാട്ടിൽ നേരത്തിനും കാലത്തിനും പെണ്ണുകെട്ടിയില്ലെങ്കിൽ നാട്ടുകാരുടെ ചോദ്യം ബന്ധുക്കളുടെ ചോദ്യം എന്നിങ്ങനെ നിരനിരയായി പിന്നാലെയുണ്ടാകും. നാട്ടുകാരോടും ബന്ധുക്കളോടും മറുപടി പറഞ്ഞ് മടുത്തവരായിരിക്കും പലരും. എന്നാൽ ഡെൻമാർക്കിലെ യുവാക്കളുടെ അവസ്ഥ ഇതിനേക്കാൾ മോശമാണ്. അവിടെ നേരത്തിനും കാലത്തിനും പെണ്ണുകെട്ടിയില്ലെങ്കിൽ നാട്ടുകാരും വീട്ടുകാരും കളിയാക്കുക മാത്രമല്ല പിടിച്ചുകെട്ടി ദേഹത്ത് കുരുമുളക് പൊടി വിതറുകയും ചെയ്യും.

30 വയസിനുള്ളിൽ കെട്ടിയില്ലെങ്കിലാണ് ഈ ക‌ടുത്ത പ്രയോഗം. മുപ്പതാം പിറന്നാൾ ദിനത്തിൽ തന്നെയായിരിക്കും കുടുംബാംഗങ്ങളും സുഹൃത്തുക്കളുമൊക്കെ പണിയൊപ്പിക്കുക.
ചിലപ്പോൾ തൂണിൽ കെട്ടിയിട്ടായിരിക്കും ഇവരുടെ ആക്രമണം. കസേരയിൽ ഇരുത്തി എഴുന്നേറ്റ് ഓടാനുള്ള അവസരമൊരുക്കുന്നവരും ഉണ്ട്.

25 വയസിനുമുമ്പ് പെണ്ണുകെട്ടിയിരിക്കണമെന്നതാണ് ഇവിടത്തെ അലിഖിത നിയമം. ഇത് ലംഘിക്കുന്നവർക്കും ശിക്ഷയുണ്ടെങ്കിലും ഇളവുണ്ടായിരിക്കും. കറുവാപ്പട്ട പൊടിയാണ് ഇവരുടെ ദേഹത്ത് വിതറുക .

സുഗന്ധവ്യഞ്ജന വ്യാപാരത്തിൽ മുഴുകി സമയത്ത് പെണ്ണുകെട്ടാൻ മറന്നുപോയ പൂർവ്വികരുടെ ഓർമ്മയിൽ നിന്നാണ് ഇങ്ങനെയൊരാചാരം ഉണ്ടായതെന്നാണ് കരുതുന്നത്. വിവാഹം മറന്നുപോയാൽ കുടുംബത്തിൽ അനന്തരാവകാശികൾ ഉണ്ടാകില്ലെന്നും അത് ജീവിതകാലംവരെ ശരീരത്തിനെയും മനസിനെയും നീറ്റുമെന്ന് ഓർമ്മിപ്പിക്കാനുമാണത്രേ മുളകുപൊടി വിതറുന്നത്.