മുല്ലപ്പൂവ് തലയിൽ ചൂടാൻ ഇഷ്ടമുള്ളവരാണ് മലയാളികൾ. കല്യാണങ്ങൾക്കും മറ്റ് വിശേഷാവസരങ്ങളിലും മുല്ലപ്പൂവ് ഒഴിച്ചുകൂടാനാവാത്ത ഒന്നാണ്. എന്നാൽ ഈ മുല്ലപ്പൂവ് കൊണ്ട് എത്രപേർ ചായ ഉണ്ടാക്കി കഴിച്ചിട്ടുണ്ട്? അനേകം ആരോഗ്യഗുണങ്ങളുള്ള ഒരു പൂവാണിതെന്ന് എത്രപേർക്കറിയാം.
ശരീരത്തിലെ ഗ്യാസ്‌ട്രിക് എൻസൈമുകളുമായുള്ള ഇടപെടൽ എളുപ്പമാക്കുന്ന ആന്റിഓക്‌സിഡന്റുകളാൽ അനുഗ്രഹീതമാണ് മുല്ലപ്പൂവ്. വായുവിന്റെ പ്രശ്നങ്ങൾ, വയറിളക്കം, മലബന്ധം, ഇറിറ്റബിൾ ബവൽ സിൻഡ്രോം എന്നീ ആരോഗ്യപ്രശ്നങ്ങൾക്കുള്ള ഉത്തമ പരിഹാരമാണ് മുല്ലപ്പൂവ്. മികച്ച ദഹനം നൽകാനും മുല്ലപ്പൂവിന് സാധിക്കും. എന്നാൽ മുല്ലപ്പൂവ് കൊണ്ട് എങ്ങനെയാണ് ചായ ഉണ്ടാക്കേണ്ടത് എന്നറിയാമോ?
മുല്ലപ്പൂവിന് അസിഡിക് നേച്ചറില്ലാത്തതിനാൽ വെറും വയറ്റിൽ കുടിക്കുന്നതുകൊണ്ട് പ്രശ്‌നമില്ല. ഗ്രീൻ ടീയോടൊപ്പം ചേർത്തും വ്യായാമത്തിന് മുൻപായി കുടിക്കുന്നതിനുകൊണ്ട് അനേകം ഗുണങ്ങളുണ്ട്. മെറ്റബോളിസം വർദ്ധിപ്പിക്കുന്നതിനും തടി കുറയുന്നതിനും ഇത് സഹായിക്കും.
മിക്കവാറും വീടുകളിലും കാണാറുള്ള ചെടിയാണ് മുല്ല. ഇതിന്റെ പൂവ് പറിച്ചെടുത്ത് നന്നായി ഉണക്കിയെടുക്കണം. ഇത് വെള്ളത്തിലിട്ട് തിളപ്പിച്ചുകുടിക്കുകയോ അല്ലെങ്കിൽ ചായയോ കാപ്പിയോ ഉണ്ടാക്കുമ്പോൾ അതിലിട്ട് തിളപ്പിക്കുകയോ ചെയ്യാം. ബിപിയുള്ളവർക്ക് റിലാക്‌സിംഗ് മൂഡ് നൽകാനും ഊർജം നൽകാനും മുല്ലപ്പൂവ് ചായയ്ക്ക് സാധിക്കും.