കറാച്ചി : പാകിസ്ഥാനിൽ സുരക്ഷാ ചെക്ക് പോസ്റ്റിന് നേരെയുണ്ടായ ഭീകരാക്രമണത്തിൽ രണ്ട് ഓഫീസർമാർ അടക്കം ഏഴ് സൈനികർ കൊല്ലപ്പെട്ടു. ഇന്നലെ അഫ്ഗാൻ അതിർത്തിയോട് ചേർന്നുള്ള വടക്കൻ വസീറിസ്ഥാൻ ജില്ലയിലെ മിർ അലി മേഖലയിലായിരുന്നു സംഭവം.

ലെഫ്. കേണൽ, ക്യാപ്റ്റൻ പദവിയിലുള്ള ഓഫീസർമാരാണ് കൊല്ലപ്പെട്ടത്. ആറ് ഭീകരരെ വെടിവച്ചു കൊന്നു. ചെക്ക് പോസ്റ്റ് വഴിയുള്ള നുഴഞ്ഞുകയറ്റ ശ്രമം പരാജയപ്പെട്ടതിന് പിന്നാലെ സ്ഫോടക വസ്തുക്കൾ നിറച്ച വാഹനവുമായി ഭീകരർ സൈനികർക്ക് നേരെ പാഞ്ഞടുക്കുകയായിരുന്നു. ഇതിനിടെ ഒന്നിലേറെ ചാവേർ സ്ഫോടനങ്ങളും ശക്തമായ വെടിവ‌യ്പു‌മുണ്ടായി. മേഖലയിൽ ഭീകരർക്കായി തെരച്ചിൽ ആരംഭിച്ചു.