ഇന്ത്യയിലെ കോടീശ്വരന്മാരുടെ പട്ടികയിൽ പുതിയതായി ഇടം പിടിച്ചിരിക്കുകയാണ് നാലുമാസം മാത്രം പ്രായമുള്ള കുഞ്ഞ്. അത് ആരാണെന്ന് അല്ലേ? ഇൻഫോസിസ് സ്ഥാപകൻ എൻ ആർ നാരായണ മൂർത്തിയുടെ ചെറുമകനാണ് ഈ നേട്ടം കെെവരിച്ചിരിക്കുന്നത്. ഏകാഗ്ര രോഹൻ മൂർത്തിയെന്നാണ് കുട്ടിയുടെ പേര്. ഒന്നും രണ്ടുമല്ല ഏകദേശം 250 കോടിയിലധികം മൂല്യമുള്ള ഓഹരിയാണ് നാരായണ മൂർത്തി തന്റെ ചെറുമകന് സമ്മാനമായി നൽകിയത്.

ഇൻഫോസിസിന്റെ 15,00,000 ഓഹരി ഏകാഗ്രയുടെ ഉടമസ്ഥതയിലായെന്നാണ് റിപ്പോർട്ട്. ഇത് കമ്പനിയുടെ ഏകദേശം 0.04 ശതമാനം ഓഹരിയാണ്. നാരായണ മൂർത്തിയുടെ ഓഹരി വിഹിതം 0.40 ശതമാനത്തിൽ നിന്ന് 0.36 ശതമാനമായി കുറയുകയും ചെയ്തു.

നാരായണ മൂർത്തിയുടെ മകൻ രോഹൻ മൂർത്തിയുടെയും അപർണ കൃഷ്ണന്റെയും മകനായ ഏകാഗ്ര 2023 നവംബറിലാണ് ജനിച്ചത്. 2019 ഡിസംബറിലായിരുന്നു ഇരുവരുടെയും വിവാഹം. നാരായണ മൂർത്തിയുടെ മൂന്നാമത്തെ പേരക്കുട്ടിയാണ് ഏകാഗ്ര. മകൾ അക്ഷത മൂർത്തിക്കും ഭർത്താവും ബ്രിട്ടീഷ് പ്രധാനമന്ത്രിയുമായ ഋഷി സുനാക്കിനും രണ്ട് പെൺമക്കളുണ്ട്.

മഹാഭാരതത്തിലെ അർജുനന്റെ കഥാപാത്രത്തിൽ നിന്ന് പ്രചോദനം ഉൾക്കൊണ്ടാണ് ഏകാഗ്ര എന്ന പേര് കുഞ്ഞിന് നൽകിയത്. 'ഏകാഗ്ര' എന്ന സംസ്‌കൃത വാക്കിന്റെ അർത്ഥം അചഞ്ചലമായ ശ്രദ്ധയും നിശ്ചയദാർഢ്യവുമെന്നാണ്.1981ൽ 10,000 രൂപയുടെ നിക്ഷേപത്തിൽ ആരംഭിച്ച ഇൻഫോസിസ് പിന്നീട് ഇന്ത്യയിലെ രണ്ടാമത്തെ വലിയ ടെക് കമ്പനിയായി വളരുകയായിരുന്നു.