പാലക്കാട്: തെങ്ങ് മുറിക്കുന്നതിനിടെ ദേഹത്തേക്കു മറിഞ്ഞുവീണ് യുവാവിന് ദാരുണാന്ത്യം. പാലക്കാട് വല്ലപ്പുഴ തെങ്ങിന്‍വളപ്പ് സ്വദേശി മണ്ണാരംകുന്നത്ത് നൗഷാദ്(44) ആണ് അപകടത്തില്‍ മരിച്ചത്.
ഇന്നു രാവിലെ ഒന്‍പതോടെയായിരുന്നു അപകടം. വല്ലപ്പുഴയിലെ സ്വകാര്യ വ്യക്തിയുടെ വീട്ടുവളപ്പില്‍ മരംമുറിക്കാന്‍ എത്തിയതായിരുന്നു നൗഷാദ്. അപകടത്തിനു പിന്നാലെ പട്ടാമ്പി താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
മൃതദേഹം വൈകുന്നേരം വല്ലപ്പുഴ യാറം ജുമാമസ്ജിദില്‍ ഖബറടക്കി. റംലത്ത് ആണ് ഭാര്യ. മക്കള്‍: ഇര്‍ഷാദ്, ഇര്‍ഷാന, റിന്‍സി, റിസ്‌വാന്‍.