ആലപ്പുഴ: ആള്‍ താമസം ഇല്ലാത്ത വീടുകള്‍ക്കും ഹരിതകര്‍മ്മ സേന കളക്ഷന്‍ ഫീസ് ഈടാക്കുന്നതിനെതിരെ പ്രതിധേഷം ഉയരുന്നു.ആലപ്പുഴ നഗരസഭയില്‍ 52വാര്‍ഡുകളില്‍ 135 ഹരിതകര്‍മ്മ സേനാ അംഗങ്ങളാണ് ഉള്ളത്. ഓരോ വാര്‍ഡിലും സേനാ അംഗങ്ങള്‍ വീടുകളില്‍ എത്തി പ്‌ളാസ്റ്റിക്ക് കളക്റ്റ് ചെയ്യുന്നത്. ഇതിന്റെ കളക്ഷന്‍ ഫീസായി 60രൂപയാണ് പ്രതിമാസം വീടുകളില്‍ നിന്ന് വാങ്ങുന്നത്.
താമസം ഇല്ലാത്തതും അടങ്ങു കിടക്കുന്നതുമായ വീടുകളുടെ വിവരം നഗരഭയില്‍ അറിയിക്കണമെന്നാണ് സേനക്ക് നല്‍കിയിട്ടുള്ള നിര്‍ദ്ദേശം. പ്‌ളാസ്റ്റിക്ക് ഉപയോഗിക്കാത്ത രണ്ട് അംഗങ്ങള്‍ മാത്രമുള്ള വീടുകളില്‍ നിന്ന് പോലും കളക്ഷന്‍ ഫീസ് വാങ്ങുന്നുണ്ട്. ഇത്തരത്തില്‍ കളക്ഷന്‍ ഫീസ് ചോദിച്ചതിനെ ചൊല്ലി തര്‍ക്കങ്ങളും പതിവാണ്. കഴിഞ്ഞ ദിവസം നഗരസഭയിലെ ഗുരമന്ദിരം വാര്‍ഡില്‍ വീട്ടുടമയും സേനാഅംഗങ്ങളും തമ്മില്‍ തര്‍ക്കമുണ്ടായി. സംഘര്‍ഷത്തിന്റെ വക്കോളം എത്തിയിരുന്നു.
കളക്ഷന്‍ ഫീസ് ഈടാക്കരുത്
ഒന്നിലധികം വീടുകളുള്ളവര്‍ക്ക് ബുദ്ധിമുട്ട് ഉണ്ടാക്കുന്നത്. താമസം ഇല്ലെങ്കിലും കളക്ഷന്‍ ഫീസ് നല്‍കണം. കളക്ഷന്‍ ഫീസ് അടച്ച രസീത് കാണിച്ചാല്‍മാത്രമേ കെട്ടിട നികുതി ഉള്‍പ്പെടെയുള്ള സേവനങ്ങള്‍ കെട്ടിട ഉടമയ്ക്ക് ലഭിക്കുകയുള്ളു. പ്രതിവര്‍ഷം 100 രൂപവരെ കെട്ടിട നികുതി അടക്കുന്ന വീടുകള്‍ക്ക് കളക്ഷന്‍ ഫീസായി നല്‍കേണ്ടത് 720 രൂപയാണ്.
'നിലവിലുള്ള നിയമം അനുസരിച്ച് ഓരോ വീടുകള്‍ക്കും കളക്ഷന്‍ ഫീസ് ഈടാക്കാനാണ് സര്‍ക്കാര്‍ നിര്‍ദ്ദേശം. തീരെ ബുദ്ധിമുട്ട് ഉള്ളവരെ ഒഴിവാക്കാന്‍ വാര്‍ഡ്തല സമിതി ലിസ്റ്റ് തയ്യാറാക്കി ,ഗ്രാമസഭയുടെ അനുമതിയോടെ ഒഴിവാക്കാന്‍ കഴിയൂ. നിലവില്‍ അത്തരത്തിലുള്ള തീരുമാനം എടുത്തിട്ടില്ല. കളക്ഷന്‍ ചാര്‍ജ്ജ് കൊടുത്തില്ലെങ്കില്‍ ഇത് ബാധ്യതയായി കിടക്കും.
പി.എസ്.എം.ഹുസൈന്‍, വൈസ് ചെയര്‍മാന്‍, നഗരസഭ
വാര്‍ഡുകള്‍ 52
ഹരിത കര്‍മ്മ സേന അംഗങ്ങള്‍ 135
കളക്ഷന്‍ ഫീസ് 60(പ്രതിമാസം)