ബംഗളൂരു: കർണാടകയിൽ ബി.ജെ.പി ജെ.ഡി.എസുമായി സീറ്റ് ധാരണയിലെത്തി. മൂന്ന് സീറ്റുകളിലാണ് എച്ച്.ഡി.ദേവഗൗഡയുടെ നേതൃത്വത്തിലുള്ള പാർട്ടി മത്സരിക്കുക. മാണ്ഡ്യ, ഹാസൻ, കോലാർ സീറ്റുകളിലാണ് മത്സരിക്കുന്നത്. ബംഗളൂരു റൂറലിൽ ദേവഗൗഡയുടെ മരുമകൻ സി.എൻ.മഞ്ജുനാഥ് ബി.ജെ.പിയിൽ നിന്ന് മത്സരിക്കും. മാണ്ഡ്യ, ഹാസൻ,​ കോലാർ മണ്ഡലങ്ങൾ ജെ.ഡി.എസിന് ലഭിക്കണമെന്നായിരുന്നു ജെ.ഡി.എസിന്റെ ആവശ്യം. എന്നാൽ ബി.ജെ.പി ഉറപ്പു പറയാത്തതിൽ നേതൃത്വത്തിന് അതൃപ്തിയുണ്ടായിരുന്നു. സംസ്ഥാനത്തെ 28 ലോക്‌സഭ സീറ്റുകളിൽ 20 എണ്ണത്തിലും ബി.ജെ.പി സ്ഥാനാർത്ഥികളെ നേരത്തെ പ്രഖ്യാപിച്ചിരുന്നു. അതേത്തുടർന്ന് ജെ.ഡി.എസ് നേതാക്കൾ ആശങ്ക പ്രകടിപ്പിച്ചതിന് പിന്നാലെയാണ് ധാരണയായത്.