മുംബയ്: മഹാരാഷ്ട്രയിലെ നന്ദേഡ്, പർഭാനി ജില്ലകളിലെ ചില ഭാഗങ്ങളിൽ ഇന്നലെ രാവിലെ ഭൂചലനം അനുഭവപ്പെട്ടു. രാവിലെ 6.08നും 6.19നും യഥാക്രമം 4.5, 3.6 തീവ്രത രേഖപ്പെടുത്തിയ ചലനമാണുണ്ടായത്. ഹിംഗോലി ജില്ലയിലെ കലംനൂരി താലൂക്കിലെ ജാംബ് ഗ്രാമത്തിലാണ് പ്രഭവകേന്ദ്രമെന്ന് നന്ദേഡിലെ ദുരന്ത നിവാരണ അതോറിറ്റി അറിയിച്ചു. നന്ദേഡിൽ, നഗരത്തിന്റെ ചില പ്രദേശങ്ങളിലും ജില്ലയിലെ അർധപുർ, മുദ്‌ഖേഡ്, നൈഗാവ്, ഡെഗ്ലൂർ, ബിലോളി താലൂക്കുകളിലും ചലനം അനുഭവപ്പെട്ടു. ആളപായമോ മറ്റു നാശനഷ്ടങ്ങളോ റിപ്പോർട്ട് ചെയ്തിട്ടില്ല. ജനങ്ങൾ പരിഭ്രാന്തരാകരുതെന്ന് കലക്ടർ അഭിജിത് റാവുത്ത് അഭ്യർത്ഥിച്ചു. അരുണാചൽ പ്രദേശിലും ഭൂചലനം ഉണ്ടായതായി റിപ്പോർട്ട് വന്നു.