ലോകമെമ്പാടുമുള്ള മുസ്ളിങ്ങൾ മനസിന്റെയും ശരീരത്തിന്റെയും തെറ്റായ ഇച്ഛകൾക്കു കടിഞ്ഞാണിട്ട് ലാേകത്തിനും തനിക്കുതന്നെയും വിശുദ്ധിയുടെ പാഠങ്ങൾ പകർന്നുനൽകുന്ന മാസമാണ് വിശുദ്ധ റംസാൻ. ഇസ്ളാമിനെക്കുറിച്ച് ഇന്ന് ആഗോളതലത്തിൽ പ്രചരിക്കുന്ന,​ അക്രമത്തിന്റെയും അശാന്തിയുടെയും ചിത്രത്തിനു പകരം യഥാർത്ഥ ഇസ്ളാമിന്റെ വശ്യവും മാതൃകാപരവുമായ ജീവിതശൈലി ലോകത്തിനു പറഞ്ഞുകൊടുക്കാൻ ഓരോ മുസൽമാനും തന്റെ ജീവിതംകൊണ്ട് കഴിയണം. അത്തരത്തിൽ പ്രവർത്തിക്കാനുള്ള വലിയ അവസരം കൂടിയാണ് റംസാൻ.

ഇസ്ളാം അതിന്റെ വിശ്വാസപ്രമാണങ്ങൾക്ക് അയവു നൽകുന്ന ഒരു വ്യവസ്ഥിതിയല്ല എന്നതോടൊപ്പം ചേർത്തുവായിക്കേണ്ടതാണ് അതിന്റെ ലാളിത്യവും പ്രതീക്ഷാനിർഭരമായ ജീവിതദർശനവും കാര്യങ്ങളോട് യോജിച്ചുപോകുവാനുള്ള അതിന്റെ ശൈലിയും. മനുഷ്യന്റെ ജീവൻ, സ്വത്ത്, അഭിമാനം എന്നിവയ്‌ക്ക് പരമപ്രാധാന്യം നൽകുന്നതാണ് ഇസ്ളാമിക ദർശനം. പ്രവാചകന്റെ വിടവാങ്ങൽ പ്രസംഗത്തിൽ ഇവയ്ക്കെതിരെ ഉണ്ടാകുന്ന കടന്നുകയറ്റങ്ങളെ മനുഷ്യാവകാശ ലംഘനങ്ങളായി കരുതി ചെറുക്കാനുള്ള ആഹ്വാനമാണ് അദ്ദേഹം നടത്തിയത്.

'(ജനങ്ങളേ) നി​ങ്ങളെല്ലാം ഒരേ പി​താവി​ന്റെ മക്കളാണ്. നി​ങ്ങളെല്ലാം ആദമി​ൽ നി​ന്നുള്ളവരാണ്. (അതി​നാൽ) അറബി​ക്ക് അനറബി​യെക്കാളോ,​ അനറബി​ക്ക് അറബി​യെക്കാളോ വെളുത്തവന് കറുത്തവനെക്കാളോ,​ കറുത്തവന് വെളുത്തവനെക്കാളോ ഒട്ടും ശ്രേഷ്ഠതയി​ല്ല​" എന്ന പ്രവാചക വചനം, വർഗ- വർണ വി​വേചനമി​ല്ലാത്ത, പണക്കാരനോ ദരി​ദ്രനോ എന്ന ഭേദമി​ല്ലാത്ത, യാതൊരു യോഗ്യതയ്ക്കും അവന്റെ സ്ഥാനത്തെ മുന്നോട്ടോ പി​ന്നോട്ടോ ചലി​പ്പി​ക്കാൻ കഴി​യാത്ത മനുഷ്യമാഹാത്മ്യത്തെ ഉയർത്തി​പ്പിടിക്കലാണ്. അതാണ് ഇസ്ളാമി​ക ദർശനത്തി​ന്റെ കാതൽ.

അതുപോലെ തന്നെ, മി​തത്വമാണ് ആ ദർശനത്തെ സമൂഹത്തോടു ചേർത്തുപി​ടി​ക്കുവാൻ പ്രേരി​പ്പി​ക്കുന്ന ഘടകം. വി​ശ്വാസം, ഭക്തി​, സ്വഭാവം, ആരാധന, പെരുമാറ്റം, ഇടപെടലുകൾ, ഇടപാടുകൾ എന്നി​ങ്ങനെ സർവകാര്യങ്ങളി​ലും മി​തത്വം പാലി​ക്കാനാണ് ഇസ്ളാം നി​ർദ്ദേശി​ച്ചി​ട്ടുള്ളത്. അതുകൊണ്ടാണ് തീവ്രമായ നി​ലപാടുകളി​ൽ നി​ന്നും, നി​ഷ്ക്രി​യതയി​ലൂന്നി​യ ഒഴി​ഞ്ഞുമാറലി​ൽ നി​ന്നും പ്രത്യയശാസ്ത്രപരമായി​ത്തന്നെ യഥാർത്ഥ മുസ്ളിങ്ങൾ അകന്നുനി​ൽക്കുന്നത്. ഒരു മദ്ധ്യമ നി​ലപാടി​നെയാണ് മുറുകെപ്പി​ടി​ക്കേണ്ടത് എന്ന ആശയം ഇന്നത്തെ ലോകത്തി​ന് കാണി​ച്ചുകൊടുക്കാൻ ഇസ്ളാം തന്നെ മാർഗരേഖ പ്രഖ്യാപി​ക്കുകയാണ്.

'​ഉമ്മത്ത് വസ്ത" അഥവാ '​മധ്യമസമുദായം" എന്നാണ് ഇസ്ളാം അറി​യപ്പെടുന്നതുതന്നെ. മതത്തി​ൽ അതി​രു കവി​യരുതെന്ന ഖുർആൻ വചനം നമ്മെ ഉറക്കെ ചി​ന്തി​പ്പി​ക്കണം. '​നി​ങ്ങൾ മതത്തി​ൽ അതി​രു കവി​യരുത്; സൂക്ഷി​ക്കുക: അതാണ് പൂർവി​കരെ നശി​പ്പി​ച്ചത്", '​മതം എളുപ്പമാണ്, മതത്തി​ൽ തീവ്രത കാണി​ച്ചവൻ പരാജയപ്പെട്ടതുതന്നെ. അതി​നാൽ മി​തത്വം പാലി​ക്കുക" തുടങ്ങി​യ പ്രവാചക വചനങ്ങളും ആധുനി​ക കാലഘട്ടത്തി​ലെ സമൂഹങ്ങൾ തമ്മി​ലുള്ള ഇടപെടലി​ന്റെ പാഠങ്ങൾ രൂപകല്പന ചെയ്യുമ്പോൾ പാലി​ക്കേണ്ട നല്ല മൂല്യങ്ങളി​ലേക്കാണ് നയി​ക്കുന്നത്. സമ്പത്ത് ചെലവഴി​ക്കുന്ന കാര്യങ്ങളി​ൽ മാത്രമല്ല; പ്രാർത്ഥനകളി​ൽപ്പോലും മി​തത്വം പാലി​ക്കേണ്ടതി​ന്റെ ആവശ്യകത വി​ശുദ്ധ ഖുർആൻ നമുക്ക് ചൂണ്ടി​ക്കാണി​ച്ചു തരുന്നു. സമത്വത്തി​ന്റെയും സാഹോദര്യത്തി​ന്റെയും സ്നേഹത്തി​ന്റെയും ആർദ്രതയുടെയും വി​ശുദ്ധി​യുടെയും സന്ദേശം പ്രചരി​പ്പിക്കുന്ന ആ ആശയമാണ് ഖുർആൻ പങ്കുവയ്ക്കുന്നത്.

ഇസ്ളാമി​ന്റെ കരുണയുടെ പാഠങ്ങൾ നമുക്കു മുന്നി​ൽ ഏറെയുണ്ട്. അന്നപാനീയങ്ങളിൽ നിന്നും, മനുഷ്യന്റെ ശാരീരി​ക ചോദനകളി​ൽ നി​ന്നുമെല്ലാം അകലം പാലി​ച്ചുകൊണ്ട് നേടുന്ന വി​ശുദ്ധി​യാണല്ലോ റംസാൻ വ്രതത്തി​ന്റെ പൊരുൾ. എന്നാൽ അതോടൊപ്പംതന്നെ, താൻ ജീവി​ക്കുന്ന സമൂഹത്തി​ലെ അശരണർക്കും അഗതി​കൾക്കും കാരുണ്യത്തി​ന്റെ കൈത്താങ്ങായി​ വർത്തി​ക്കുവാനും റംസാൻ വഴി​കാട്ടുന്നുണ്ട്. സക്കാത്തി​ന്റെയും സദഖയുടെയും പ്രതി​ഫലം റംസാനിൽ കൂടുതലായി​ വാഗ്ദാനം ചെയ്യപ്പെട്ടി​രി​ക്കുന്നത് അതുകൊണ്ടാണ്.

'​അയൽവാസി​ പട്ടി​ണി​കി​ടക്കുമ്പോൾ, വയർനി​റയെ ഭക്ഷണം കഴി​ക്കുന്നവർ എന്നി​ൽപ്പെട്ടവനല്ല!'​ എന്ന ഇസ്ളാമി​ന്റെ ശാശ്വതമൂല്യം അതി​ന്റെ ഏറ്റവും പവി​ത്രവും മഹത്തരവുമായ ഭാവത്തെയാണ് പ്രകടമാക്കുന്നത്. ജാതി​- മത- വർഗ- വർണ ഭേദമി​ല്ലാതെ എല്ലാവരുടെയും പട്ടി​ണി​യി​ൽനി​ന്നുള്ള മുക്തി​യും മനുഷ്യസമൂഹത്തി​ന്റെ സാർവത്രി​ക സാഹോദര്യ മൂല്യവുമാണ് ഇസ്ളാം പ്രഘോഷി​ക്കുന്നത്. ഇസ്ളാമി​ന്റെ ഈ ആദർശങ്ങൾ മുറുകെപ്പി​ടി​ക്കലാണ് ഓരോ മുസൽമാന്റെയും കടമ.

(ലേഖകന്റെ ഫോൺ​: 94463 08600)