ന്യൂഡൽഹി: അന്വേഷണത്തിന്റെ പേരിൽ സി.ബി.ഐ രാഷ്ട്രീയം കളിക്കുന്നത് തടയണമെന്നാവശ്യപ്പെട്ട് തൃണമൂൽ കോൺഗ്രസ് നേതാവ് മഹുവ മൊയ്‌ത്ര തിരഞ്ഞെടുപ്പ് കമ്മിഷനു പരാതി നൽകി. പ്രചാരണം തടസപ്പെടുത്താനാണ് സി.ബി.ഐ ശ്രമം. രാഷ്ട്രീയ നിർദ്ദേശങ്ങളുടെ അടിസ്ഥാനത്തിലാണ് അവർ പ്രർത്തിക്കുന്നത്. നിയമവിരുദ്ധവും അനുചിതവുമായ നീക്കങ്ങളാണ് നടക്കുന്നതെന്നും പരാതിയിൽ പറയുന്നു.

പെരുമാറ്റച്ചട്ടം നിലവിലുള്ളപ്പോൾ അന്വേഷണ ഏജൻസികളുടെ പ്രവർത്തനത്തിന് പ്രത്യേക മാർഗനിർദ്ദേശം വേണമെന്നും തിരഞ്ഞെടുപ്പ് കാലത്ത് സ്ഥാനാർത്ഥികൾക്കും രാഷ്ട്രീയ പാർട്ടികൾക്കുമെതിരെ കടുത്ത നടപടി ഉണ്ടാകാൻ പാടില്ലെന്നും മഹുവ പരാതിയിൽ ആവശ്യപ്പെട്ടു. ലോക്‌സഭയിൽ ചോദ്യങ്ങൾ ഉന്നയിക്കാൻ പണം വാങ്ങിയെന്ന പരാതിയിലാണ് കഴിഞ്ഞ ദിവസം സി.ബി.ഐ മഹുവയുടെ വസതിയിൽ റെയ്ഡ് നടത്തിയത്. ബംഗാളിലെ കൃഷ്ണനഗറിലെ സ്ഥാനാർത്ഥിയാണ് അവർ.