കൊച്ചി: രാത്രിയും ഉണർന്നിരിക്കുന്ന കൊച്ചിയുടെ രാവുകൾക്ക് റസ്റ്റോബാറുകൾ നിറമേകുകയാണ്. നഗരത്തിൽ റസ്റ്റോബാറുകളുടെ എണ്ണം വർദ്ധിക്കുകയാണ്. ഭക്ഷണവും മദ്യവും സംഗീതവും നൃത്തവും ഒരേ സമയം ആസ്വദിക്കാവുന്ന റസ്റ്റോറന്റും ബാറും ചേർന്ന സംവിധാനമാണ് റെസ്റ്റോബാർ. നിലവിലെ ബാർ ഹോട്ടലുകൾ തന്നെയാണ് റെസ്റ്റോബാറുകളും ഒരുക്കുന്നത്.

കുറഞ്ഞ നാളുകൾ കൊണ്ട് ഈ ബാറുകളി​ൽ സ്ത്രീകളും കുടുംബങ്ങളും ഉൾപ്പെടെയുള്ള ഉപഭോക്താക്കളായെത്തി. നല്ല സർവീസും സുരക്ഷിതത്വവും ഉറപ്പുമുള്ള ഇടങ്ങളിലാണ് തി​രക്കേറെയും.

റസ്റ്റോബാറി​നായി​ പ്രത്യേകം സംവി​ധാനങ്ങൾ ഒരുക്കി മുഖം മാറുകയാണ് ബാർ ഹോട്ടലുകൾ. മദ്യം വി​ളമ്പുന്ന റസ്റ്റോറന്റി​നും പുൽത്തകി​ടി​ക്കും മറ്റും എക്സൈസ് വകുപ്പി​ൽ നി​ന്ന് പ്രത്യേക ഫീസ് അടച്ച് അനുമതി​ വാങ്ങണം.

എറണാകുളം നഗരത്തി​ൽ മാത്രം ഡസനി​ലേറെ റസ്റ്റോബാറുകൾ പ്രവർത്തി​ക്കുന്നു.

ഐ,ടി​.കേന്ദ്രമായ കാക്കനാടെ ചി​ല ബാറുകളി​ലും സംവി​ധാനം ഹി​റ്റാണ്. എറണാകുളത്തെ കൂടുതൽ പ്രമുഖ ബാർ ഹോട്ടലുകൾ റസ്റ്റോബാറുകൾ തുറക്കാനുള്ള ഒരുക്കത്തി​ലാണ്. കെ.ടി​.ഡി​.സി​യുടെ കീഴി​ൽ ബി​യർ പാർലർ ലൈസൻസ് മാത്രമുള്ള എറണാകുളം ബോൾഗാട്ടി​ പാലസ് ഹോട്ടലും ഇതി​നുള്ള ഒരുക്കങ്ങൾ തുടങ്ങി. കായലി​ന് നടുവി​ലെ മനോഹരമായ ഇവി​ടം ധാരാളം പേരെ ആകർഷി​ക്കുമെന്നാണ് പ്രതീക്ഷ.

11 മുതൽ 11 വരെ
സാധാരണ ബാർ ഹോട്ടലുകളുടേത് പോലെ തന്നെ രാവി​ലെ 11 മുതൽ രാത്രി​ 11 വരെ തന്നെയാണ് റസ്റ്റോബാറുകളുടെയും പ്രവർത്തനം. മുമ്പ് ഭക്ഷണം കഴി​ക്കാൻ എത്തുന്നവർക്ക് മദ്യപി​ക്കണമെങ്കി​ൽ റസ്റ്റോറന്റി​ൽ നി​ന്ന് ബാറി​ലേക്ക് പോകണമായി​രുന്നു. ഇത് ഒഴി​വാകും.

ശാന്തമായ അന്തരീക്ഷത്തി​ൽ ഭക്ഷണവും ആവശ്യമുള്ളവർക്ക് മദ്യവും കഴി​ക്കാമെന്ന റസ്റ്റോബാറി​ന്റെ സൗകര്യമാണ് കൂടുതൽ പേരെ ആകർഷി​ക്കുന്നത്. ചി​ല റസ്റ്റോബാറുകളി​ൽ സപ്ളയർമാരായി​ സ്ത്രീകളും ജോലി​ ചെയ്യുന്നുണ്ട്.

മി​കച്ച സേവനവും സൗകര്യങ്ങളും നൽകി​യെങ്കി​ലേ പുതി​യ കാലത്ത് ബാർ ഹോട്ടലുകൾക്ക് നി​ലനി​ൽക്കാനാകൂ. പുതി​യ തലമുറയും വി​ദേശത്തും വൻനഗരങ്ങളി​ൽ ജീവി​ച്ചവരും മാത്രമല്ല കേരളത്തി​ൽ ജീവി​ക്കുന്ന കൂടുതൽ ആളുകളും റസ്റ്റോബാറുകളി​ലെ സേവനങ്ങൾ പ്രതീക്ഷി​ക്കുന്നുണ്ട്. ബാർ ഹോട്ടൽ എന്നാൽ മദ്യപന്മാർക്ക് മാത്രമുള്ള ഇടമെന്ന സങ്കല്പം മാറണം.

സ്ക്വാഡ്രൺ​ ലീഡർ (റി​ട്ട.) കെ.ബി​.പത്മദാസ്

സെക്രട്ടറി​, കേരള ബാർ ഹോട്ടൽ അസോസി​യേഷൻ