അഹമ്മദാബാദ്: ഞായറാഴ്ച മുംബയ് ഇന്ത്യന്‍സ് - ഗുജറാത്ത് ടൈറ്റന്‍സ് മത്സരം പുരോഗമിക്കുന്നതിനിടെ ഗ്യാലറിയില്‍ സംഘര്‍ഷം. മത്സരം നടക്കുന്നതിനിടെ ചില ആളുകള്‍ പരസ്പരം തല്ലുകൂടുന്നതും മര്‍ദ്ദിക്കുന്നതും വാക്കേറ്റത്തിലേര്‍പ്പെടുന്നതിന്റേയും ദൃശ്യങ്ങളാണ് ഇപ്പോള്‍ പുറത്ത് വന്നിരിക്കുന്നത്. സംഘര്‍ഷം ഉണ്ടായതിന്റെ കാരണം വ്യക്തമല്ലെങ്കിലും രോഹിത് ശര്‍മ്മയുടേയും ഹാര്‍ദിക് പാണ്ഡ്യയുടേയും ആരാധകര്‍ തമ്മില്‍ ഏറ്റുമുട്ടിയതാണെന്നാണ് സമൂഹമാദ്ധ്യമങ്ങളില്‍ ഇത് വ്യാഖ്യാനിക്കപ്പെടുന്നത്.
ഗുജറാത്ത് ടൈറ്റന്‍സില്‍ നിന്ന് ഹാര്‍ദിക് പാണ്ഡ്യ തന്റെ പഴയ തട്ടകമായ മുംബയ് ഇന്ത്യന്‍സിലേക്ക് മടങ്ങി എത്തിയത് മുതല്‍ മുന്‍ ചാമ്പ്യന്‍മാരുടെ ഉള്ളില്‍ കാര്യങ്ങള്‍ അത്ര സുഖകരമല്ലെന്നാണ് റിപ്പോര്‍ട്ടുകള്‍. ഐപിഎല്ലിലെ ഏറ്റവും മികച്ച നായകനും അഞ്ച് തവണ മുംബയ് ഇന്ത്യന്‍സിനെ കിരീടനേട്ടത്തിലേക്ക് നയിക്കുകയും ചെയ്ത രോഹിത്തിനെ നായക സ്ഥാനത്ത് നിന്ന് മാറ്റിയത് മുതല്‍ ടീമിന് ആരാധക പിന്തുണ കുറഞ്ഞിരുന്നു.
ലക്ഷക്കണക്കിന് ആരാധകരാണ് രോഹിത്തിനെ നായകസ്ഥാനത്ത് നിന്ന് മാറ്റിയതില്‍ പ്രതിഷേധിച്ച് മുംബയ് ടീമിന്റെ സമൂഹമാദ്ധ്യമ പേജുകള്‍ അണ്‍ഫോളോ ചെയ്തത്. ഇതിന്റെ തുടര്‍ച്ചയായി ചില രംഗങ്ങള്‍ മത്സരത്തിലും ഗ്യാലറിയിലും അരങ്ങേറി. രോഹിത്തിനോട് ബൗണ്ടറി ലൈനിലേക്ക് പോകാന്‍ ഹാര്‍ദിക് ആംഗ്യം കാണിക്കുന്നതും എന്നോടാണോ എന്ന് ആംഗ്യത്തിലൂടെ രോഹിത് ചോദിക്കുന്നതുമായ വീഡിയോ വ്യാപകമായി പ്രചരിക്കപ്പെടുന്നുണ്ട്.
മത്സരത്തില്‍ ഗുജറാത്ത് സ്വദേശിയായ പാണ്ഡ്യ ടോസ് ചെയ്യാന്‍ എത്തിയത് മുതല്‍ കൂകി വിളിച്ചാണ് കാണികള്‍ സ്വീകരിച്ചത്. മത്സരത്തില്‍ ടിവി സ്‌ക്രീനില്‍ പാണ്ഡ്യ പ്രത്യക്ഷപ്പെടുമ്പോഴെല്ലാം കാണികള്‍ കൂവി തിമിര്‍ത്തു. ഗുജറാത്ത് വിട്ട് മുംബയിലേക്ക് മടങ്ങിയതില്‍ പ്രതിഷേധിച്ചുള്ള ഗുജറാത്ത് ആരാധകരുടേയും രോഹിത്തിന്റെ നായകസ്ഥാനം തട്ടിയെടുത്തെന്ന് ആരോപിച്ച് മുംബയ് ആരാധകരും ഹാര്‍ദിക്കിനെ കണക്കിന് കൂവി ശിക്ഷിച്ചു. ഇതിന് പിന്നാലെയാണ് ഇപ്പോള്‍ ഗ്യാലറിയില്‍ സംഘര്‍ഷമുണ്ടായതിന്റെ വീഡിയോ പുറത്ത് വന്നിരിക്കുന്നത്.
Fight Between #ONEFAMILY
— Satya Prakash (@Satya_Prakash08) March 25, 2024
Hardik Pandya fans abused Rohit Sharma fans and they were fighting yesterday.
One bad decision of Mumbai Indians managment completely broken Mumbai Indians team and divided fans in parts. pic.twitter.com/ycXLTCnlNc