കൊല്ലം: ഇരവിപുരം പൊലീസ് സ്റ്റേഷനി​ൽ കയറി പൊലീസ് ഉദ്യോഗസ്ഥരെ ആക്രമിച്ച് പരിക്കേൽപ്പിച്ച പ്രതികൾ അറസ്റ്റിലായി. താന്നി, കാരിത്താസ് ഗാർഡൻ​ അബിൻ എന്ന അഭിഷേക് (24), താന്നി ഫിഷർമെൻ കോളനി ജോബി നിവാസിൽ ജോബിൻ ജോയ് (28), താന്നി കാരിത്താസ് ഗാർഡൻ​ ജയ്‌സൺ (30), ഇരവിപുരം ശരവണ നഗർ 41 വിപിൻ നിവാസിൽ വിവേക് (31), വിപിൻ (33) എന്നിവരാണ് അറസ്റ്റിലായത്. ഞായറാഴ്ച രാത്രി 11ഓടെ ഇരവിപുരം പൊലീസ് സ്റ്റേഷന് സമീപത്തെ ബാറിൽ സംഘർഷം നടക്കുന്നതായി വിവരം ലഭിച്ചതിന്റെ അടിസ്ഥാനത്തിൽ അവിടെയെത്തിയ പൊലീസ് സംഘം പ്രതികളെയും കൂട്ടരെയും അവിടെ നിന്നു പറഞ്ഞയച്ചിരുന്നു. ഈ വിരോധത്താൽ പ്രതികൾ ഉൾപ്പെട്ട അക്രമി സംഘം രാത്രി 11.30ഓടെ ഇരവിപുരം പൊലീസ് സ്റ്റേഷനിലെത്തി ഡ്യൂട്ടിയിലുണ്ടായിരുന്ന പൊലീസ് ഉദ്യോഗസ്ഥരെ ചീത്ത വിളിച്ചുകൊണ്ട് ആക്രമിക്കുകയായിരുന്നു. ആക്രമണത്തിൽ സ്റ്റേഷനിലെ ജി.ഡി ചാർജ്ജ് വഹിച്ചിരുന്ന എ.എസ്.ഐ പ്രസന്നന്റെ ഇടത് തോളി​ന് പരി​ക്കുണ്ടായി​. പ്രതികളെ ഉടൻ തന്നെ പിടികൂടി​. ഇൻസ്‌പെക്ടർ ഷിബുവിന്റെ നേതൃത്വത്തിലാണ് ഇവരെ അറസ്റ്റ് ചെയ്തത്.