ന്യൂഡൽഹി: ബംഗാൾ മുഖ്യമന്ത്രിയും തൃണമൂൽ കോൺഗ്രസ് നേതാവുമായ മമത ബാനർജിക്കെതിരെ അധിക്ഷേപ പരാമർശവുമായി ബിജെപി നേതാവ് ദിലീപ് ഘോഷ്. രൂക്ഷമായ ഭാഷയിലാണ് മമതയ്‌ക്കെതിരെ ദിലീപ് സംസാരിച്ചത്.
'ഗോവയുടെയും ത്രിപുരയുടെയും മകളാണ് താൻ എന്ന് അവകാശപ്പെടുന്ന മമത തന്റെ അച്ഛൻ ആരാണെന്ന് തീരുമാനിക്കണം. എല്ലാവരുടെയും മകളാകുന്നത് നല്ലതല്ല.' - എന്നാണ് ബിജെപി ബംഗാൾ മുൻ അദ്ധ്യക്ഷൻ കൂടിയായ ദിലീപ് ഘോഷ് പറഞ്ഞത്.
ഈ പരാമർശത്തിനെതിരെ അതിരൂക്ഷ വിമർശനവുമായി തൃണമൂൽ കോൺഗ്രസും രംഗത്തെത്തിയിട്ടുണ്ട്. ദിലീപ് ഘോഷിനെതിരെ പെരുമാറ്റച്ചട്ടം ലംഘിച്ചുവെന്ന് കാട്ടി തിരഞ്ഞെടുപ്പ് കമ്മീഷനിൽ പരാതി നൽകുമെന്നും ടിഎംസി അറിയിച്ചിട്ടുണ്ട്. മമതയെ അപമാനിക്കുന്ന പരാമർശമാണിത്. ആർഎസ്‌എസും ബിജെപിയും സ്ത്രീ വിരുദ്ധമായാണ് പ്രവർത്തിക്കുന്നത്. മമതയ്‌‌ക്കെതിരായ പരാമർശത്തിൽ വനിതാ കമ്മീഷൻ നടപടി വേണമെന്നും ടിഎംസിയെ പ്രതിനിധീകരിച്ച് സുഷ്‌മിത ദേവ് പറഞ്ഞു.