മലപ്പുറം: അടയ്‌ക്കാ കള്ളന്മാരെ പിടിക്കാൻ കമുകിൻ തോട്ടത്തിൽ സ്ഥാപിച്ച ക്യാമറയും മോഷ്ടിച്ച കള്ളന്മാർ പിടിയിൽ. സംഭവത്തിൽ മൂന്നുപേരെ പൊലീസ് അറസ്റ്റ് ചെയ്‌തു. മമ്പാട്ടുമൂല സ്വദേശികളായ നെല്ലുന്നൻ ജിഷ്‌ണു, പൂലോടൻ ശ്രീജിത്ത്, മരുതത്ത് മുഹമ്മദ് സനൂപ് എന്നിവരാണ് പൊലീസിന്റെ പിടിയിലായത്.
കമുകിൻ തോട്ടത്തിൽ നിന്ന് അടക്ക മോഷണം പതിവായതോടെ സഹികെട്ട് തോട്ടമുടമ കണ്ടത്തിൽ ഗോപിനാഥൻ ആരുമറിയാതെ രണ്ടിടത്ത് ക്യാമറ സ്ഥാപിക്കുകയായിരുന്നു. എന്നാൽ, തൊട്ടടുത്ത ദിവസം ക്യാമറ മോഷണം പോയി. തുടർന്ന് നടത്തിയ തെരച്ചിലിൽ ക്യാമറ നശിപ്പിച്ച നിലയിൽ കണ്ടെത്തിയിരുന്നു.
എന്നാൽ, ക്യാമറ മോഷ്ടിച്ച 'വിദഗ്ദ്ധന്മാരുടെ' ദൃശ്യങ്ങൾ മറ്റൊരു ക്യാമറയിൽ റെക്കോർഡ് ആകുന്നുണ്ടെന്ന കാര്യം പ്രതികൾ അറിഞ്ഞിരുന്നില്ല. പ്രതികളുടെ പേരിൽ പൊലീസ് കേസെടുത്തിട്ടുണ്ട്. ഇവരെ മഞ്ചേരി കോടതിയിൽ ഹാജരാക്കി.