മലപ്പുറം: ജില്ലയിൽ ഡെങ്കിപ്പനി കൂടുതലായ സാഹചര്യത്തിൽ പൊതുജനങ്ങൾ പ്രത്യേക ശ്രദ്ധ പുലർത്തണമെന്ന് ജില്ലാ മെഡിക്കൽ ഓഫീസർ ഡോ.ആർ.രേണുക. ജനുവരി മുതൽ ഇതുവരെ ജില്ലയിൽ സ്ഥിരീകരിച്ച 469 ഡെങ്കിപ്പനി കേസുകളും സംശയാസ്പദമായ 581 കേസുകളുമാണ് റിപ്പോർട്ട് ചെയ്തിട്ടുള്ളത്. ജില്ലയിൽ ഏറ്റവും കൂടുതൽ ഡെങ്കിപ്പനി കേസുകൾ റിപ്പോർട്ട് ചെയ്തിട്ടുള്ളത് ചുങ്കത്തറ, എടവണ്ണ, വണ്ടൂർ ഹെൽത്ത് ബ്ലോക്കുകളിലാണ്. ചുങ്കത്തറ ഹെൽത്ത് ബ്ലോക്ക്, എടവണ്ണ ഹെൽത്ത് ബ്ലോക്ക്, വണ്ടൂർ ഹെൽത്ത് ബ്ലോക്ക് എന്നിവിടങ്ങളിലെ സ്ഥിരീകരിച്ച ഡെങ്കി കേസുകളുടെ എണ്ണം യഥാക്രമം 120, 80, 67 എന്നിങ്ങനെയാണ്.

ഡെങ്കിപ്പനി

ശുദ്ധജലത്തിൽ വളരുന്ന ഈഡിസ് കൊതുകുകളാണ് ഡെങ്കിപ്പനി പരത്തുന്നത്. പകൽ സമയത്താണ് ഇവ മനുഷ്യരെ കൂടുതലായി കടിക്കുന്നത്. നാലുതരം അണുക്കളാണ് ഡെങ്കിപ്പനി പരത്തുന്നത്. ഒരു ഇനം വൈറസ് മൂലം ഡെങ്കിപ്പനി വന്ന് ഭേദമായ വ്യക്തിക്ക് തുടർന്ന് മറ്റൊരു ഇനം വൈറസ് മൂലം ഡെങ്കിപ്പനി ബാധിച്ചാൽ രോഗം ഗുരുതരമാവും.

ലക്ഷണങ്ങൾ

ഡെങ്കി വൈറസ് ശരീരത്തിൽ കയറിയാൽ അഞ്ചുമുതൽ എട്ട് ദിവസം എടുത്താണ് രോഗം പുറത്തേക്ക് വരുന്നത്. അതി തീവ്രമായ പനി (104 ഡിഗ്രി വരെ), കടുത്ത തലവേദന, കണ്ണുകൾക്ക് പിന്നിൽ വേദന, കടുത്ത ശരീരവേദന,​ തൊലിപ്പുറത്ത് ചുവന്ന പാടുകൾ, ഛർദ്ദിയും ഓക്കാനവും തുടങ്ങിയവയാണ് പ്രധാന ലക്ഷണങ്ങൾ. അസഹനീയമായ വയറുവേദന, മൂക്കിൽ നിന്നും വായിൽ നിന്നും മോണയിൽ നിന്നും രക്തസ്രാവം, ബോധക്ഷയം, തൊണ്ട വരളുക, ശ്വാസോച്ഛ്വാസത്തിന് വിഷമം, രക്തത്തോടു കൂടിയോ ഇല്ലാതെയോ ഇടവിട്ടുള്ള ഛർദ്ദി, കറുത്ത നിറത്തിൽ മലം പോവുക, അമിതമായ ദാഹം എന്നിവ കൂടി കാണപ്പെട്ടാൽ എത്രയും വേഗം വൈദ്യസഹായം തേടണം.

പ്രതിരോധ മാർഗ്ഗങ്ങൾ

വീടും പരിസരവും വൃത്തിയായി സൂക്ഷിക്കണം. വെള്ളം കെട്ടി നിൽക്കാൻ അനുവദിക്കരുത്. രോഗം വന്നയാളെ കൊതുക് വലയ്ക്കുള്ളിൽ തന്നെ കിടത്താൻ ശ്രമിക്കുക. രോഗിയെ കടിക്കുന്ന കൊതുക് മറ്റുള്ളവരെ കടിച്ചാൽ രോഗം പകരാൻ സാദ്ധ്യതയുള്ളതിനാൽ കൊതുക് കടിക്കാതിരിക്കാൻ ശ്രദ്ധിക്കണം. കൈകളും കാലുകളും നന്നായി മറച്ച് വസ്ത്രം ധരിക്കുക. കൊതുകുകടി ഒഴിവാക്കാൻ തൊലിപ്പുറത്ത് ക്രീമുകൾ, ലേപനങ്ങൾ ഉപയോഗിക്കാം.രോഗിക്ക് മതിയായ വിശ്രമം നൽകണം. ധാരാളം വെള്ളം കുടിക്കണം.

ശ്രദ്ധിക്കേണ്ടവ

* കൊതുക് പെരുകാൻ സാദ്ധ്യതയുള്ള ഉറവിടങ്ങൾ ഇല്ലാതാക്കണം. വെള്ളം കെട്ടി നിൽക്കാൻ സാദ്ധ്യതയുള്ള എല്ലാ വസ്തുക്കളും നീക്കം ചെയ്യുക. കെട്ടി നിൽക്കുന്ന വെള്ളം ഒഴുക്കിക്കളയണം.

* ഉറവിട നശീകരണം ഉറപ്പുവരുത്തുക.

* പാഴ് വസ്തുക്കൾ വലിച്ചെറിയാതെ ശാസ്ത്രീയമായി സംസ്‌കരിക്കുക.

* വീടിനുള്ളിലും പരിസര പ്രദേശങ്ങളിലും വെള്ളം കെട്ടിക്കിടക്കുന്നില്ലെന്ന് ഉറപ്പാക്കുക.

* ഓവർ ഹെഡ് ടാങ്കുകൾ അടച്ചു സൂക്ഷിക്കുക.

* വെള്ളം പിടിച്ചു വയ്ക്കുന്ന പാത്രങ്ങൾ മൂടിവയ്ക്കുക.

* വെള്ളം പിടിച്ചു വയ്ക്കുന്ന പാത്രങ്ങൾ ചകിരി ഉപയോഗിച്ച് കഴുകിയ ശേഷം മാത്രം വീണ്ടും വെള്ളം നിറയ്ക്കുക.

* പാത്തികൾ, സൺഷൈഡുകൾ തുടങ്ങിയ സ്ഥലങ്ങളിൽ വെള്ളം കെട്ടിക്കിടക്കുന്നുണ്ടോ എന്ന് പരിശോധിക്കുക.

* ചെടിച്ചട്ടികൾ, ഫ്രിഡ്ജിന് പിന്നിലെ ട്രേ, കൂളറുകളുടെ പിൻവശം തുടങ്ങിയ സ്ഥലങ്ങളിൽ വെള്ളം കെട്ടി കിടക്കുന്നില്ലെന്ന് ഉറപ്പുവരുത്തുക.

* രോഗി നിർബന്ധമായും കൊതുകുവല ഉപയോഗിക്കുക

* കൃഷിയിടങ്ങളിൽ കൊതുക് വളരുന്ന സാഹചര്യം ഒഴിവാക്കുക.