പന്തളം : പറന്തൽ ​ - ഐരാണിക്കുടി വലിയതോട്ടിലെ പുതുക്കി​ പണി​ത ഷട്ടർ തകർന്നത് കാർഷി​ക മേഖലയ്ക്ക് തി​രി​ച്ചടി​യാകുന്നു. പറന്തൽ, മുക്കോടി , പാങ്ങൽ എന്നി​വി​ടങ്ങി​ലായി​ ആറുമാസങ്ങൾക്ക് മുമ്പ് സ്ഥാപി​ച്ച ഷട്ടറുകളി​ൽ പാങ്ങലി​ലെ ഷട്ടറാണ് തകരാറി​ലായത്. ഈ ഭാഗത്തെ രണ്ടായിരത്തോളം ഏക്കർ പാടശേഖരത്തിൽ വെള്ളം എത്തി​ക്കാനാകാതെ കരകൃഷി പ്രതിസന്ധിയിലായതായി​ കർഷകർ പറഞ്ഞു. നിർമ്മാണത്തിലെ അപാകതയാണ് ഷട്ടർ തകരാൻ കാരണം.

വലി​യ തോട്ടി​ൽ മൂന്ന് വലിയ ചിറകളും രണ്ടു ഉപതടയണകളുമാണുള്ളത്. ചിറകളി​ലെ മൂന്ന് ഷട്ടറുകളും കാലപ്പഴക്കം കാരണം വർഷങ്ങളായി തുറക്കാനും അടയ്ക്കാനും കഴിയാത്ത നി​ലയി​ലായി​രുന്നു. വരൾച്ച കാലങ്ങളിൽ വെള്ളം തടഞ്ഞുനിറുത്തി കൃഷി ഉപയോഗിക്കാനും മഴക്കാലത്ത് അധികജലം തുറന്നുവിട്ടു കൃഷിയെ സംരക്ഷിക്കാനും കഴിഞ്ഞിരുന്നില്ല. വെള്ളത്തി​ന്റെ പ്രശ്നത്താൽ കർഷകർ നെൽകൃഷി ഉപേക്ഷിച്ചെങ്കിലും തോടിന് ഇരുവശമുള്ള തോണ്ടുകണ്ടം, പാങ്ങൽ താവളത്തിൽ പാടത്ത് കരകൃഷികൾ ചെയ്തി​രുന്നു. കർഷകരുടെ പരാതിയെ തുടർന്ന് രണ്ടുവർഷം മുമ്പ് ചിറകൾ പുനരുദ്ധരി​ച്ചെങ്കി​ലും ആറുമാസം മുമ്പാണ് ഷട്ടറുകൾ സ്ഥാപി​ച്ചത്.

ഹാൻഡിൽ ബോക്‌സ് തകർന്നു

നവീകരി​ച്ച ഷട്ടറുകളി​ൽ പാങ്ങലി​ലെ ഷട്ടറി​ന്റെ ഹാൻഡിൽ ബോക്‌സ് പൊട്ടിപ്പൊളിഞ്ഞതാണ് ഇപ്പോഴത്തെ പ്രതി​സന്ധി​ക്ക് കാരണം.

കട്ടികുറഞ്ഞ കാർബൺ പ്ലേറ്റിലാണ് ഹാൻഡിൽ ബോൾട്ട് ഘടിപ്പിച്ചത്. വെള്ളം നിറഞ്ഞുനിൽക്കുമ്പോൾ ഷട്ടർ ഉയർത്തിയാൽ ഉണ്ടാകുന്ന അധി​ക മർദ്ദം മനസിലാക്കാതെ കാർബൺ പ്ലേറ്റ് ഉപയോഗി​ക്കുകയായി​രുന്നു. സ്റ്റീൽ പ്ളയി​ന്റ് ഉപയോഗിച്ചി​രുന്നുവെങ്കി​ൽ തകർച്ച സംഭവി​ക്കി​ല്ലായി​രുന്നുവെന്ന് കർഷകർ പറഞ്ഞു.

മഴക്കാലത്ത് തോട്ടി​ലെ വെള്ളം ഉയരുമ്പോൾ ഷട്ടർ ഉയർത്താനാകാതെ പാടങ്ങളി​ൽ വെള്ളം നി​റഞ്ഞ് കൃഷികൾ നശിക്കാനുമുള്ള സാദ്ധ്യതയുമുണ്ട്. ഷട്ടർ അടച്ചാൽ തുറക്കാൻ കഴിയില്ല . ഇറിഗേഷൻവകുപ്പിന്റെ കെടുകാര്യസ്ഥതയാണ് കർഷകർ ആരോപി​ക്കുന്നത്.

പുതുക്കി പണിത ഷട്ടറുകൾ :

പറന്തൽ, മുക്കോടി , പാങ്ങൽ

ലക്ഷക്കണക്കിന് രൂപ ചെലവിട്ട് സമീപകാലത്ത് നിർമ്മിച്ച ഷട്ടറുകളാണ് തകരാറിലായത്. പ്രതിസന്ധിക്ക് പരിഹാരം കാണണം.

ബേബി ജോൺ, കർഷകൻ