കോഴഞ്ചേരി : സെന്റ് തോമസ് കോളേജ് റോഡ് നിർമ്മാണത്തിന് 4.28 കോടി രൂപ അനുവദിച്ചെന്ന് മന്ത്രി വീണാജോർജ് പറഞ്ഞു. കോഴഞ്ചേരി മാരാമൺ കൺവെൻഷൻ നടപ്പാത ജനങ്ങൾക്കു സമർപ്പിച്ച് സംസാരിക്കുകയായിരുന്നു മന്ത്രി. എം.എൽ.എയുടെ ആസ്തി വികസന ഫണ്ടിൽ നിന്ന് 50 ലക്ഷം രൂപ ചെലവിലാണ് കിഴക്കേ തീരത്ത് മാരാമൺ കൺവെൻഷൻ സെന്ററിലേക്കുള്ള നടപ്പാതയുടെ പുനരുദ്ധാരണവും സൗന്ദര്യവത്കരണവും നടത്തിയത്.
വള്ളംകുളം കോഴഞ്ചേരി റോഡ് ബിസി നിലവാരത്തിലേക്കുയർത്തുവാൻ 7.20 കോടി രൂപ അനുവദിച്ചു. കോഴഞ്ചേരി നഗരവികസനത്തിന്റെ ഡി.പി.ആർ പൂർത്തിയായതായും മന്ത്രി പറഞ്ഞു. കോഴഞ്ചേരി ഗ്രാമപഞ്ചായത്ത് പ്രസിഡന്റ് റോയ് ഫിലിപ്പ് അദ്ധ്യക്ഷത വഹിച്ചു. ഇലന്തൂർ ബ്ലോക്ക് പഞ്ചായത്ത് പ്രസിഡന്റ് ജെ. ഇന്ദിരാദേവി, ഗ്രാമപഞ്ചായത്ത് അംഗങ്ങളായ ബിജിലി പി. ഈശോ, മിനി സുരേഷ് തുടങ്ങിയവർ പങ്കെടുത്തു.