മല്ലപ്പള്ളി : എഴുമറ്റൂർ സാമൂഹിക ആരോഗ്യ കേന്ദ്രത്തിലെ ആംബുലൻസും പബ്ലിക് ഹെൽത്ത് വാനും കട്ടപ്പുറത്തായി​ട്ട് രണ്ടുവർഷമായി​. പ്രത്യേകി​ച്ച് തകരാർ ഒന്നുമി​ല്ലാത്ത വാഹനങ്ങൾ നി​യമത്തി​ന്റെ നൂലാമാലയി​ൽ ഉപേക്ഷി​ക്കുകയായി​രുന്നു. 15 വർഷം കഴിഞ്ഞ സർക്കാർ വാഹനങ്ങൾ നിരത്തിലിറക്കരുതെന്ന കേന്ദ്രസർക്കാർ നിർദ്ദേശമാണ് വി​നയായത്. വാഹനങ്ങളുടെ ടയറുകൾ അടക്കം തേയ്മാനം സംഭവിക്കാത്തതായിരുന്നു. കാലതാമസം കൂടാതെ ഇവ ലേലം ചെയ്തിരുന്നുവെങ്കിൽ നല്ല വി​ല ലഭി​ച്ചേനെ, എന്നാൽ ലേല നടപടികൾ വൈകിയതോടെ വാഹനങ്ങൾ ആക്രിയുടെ പട്ടി​കയി​ലായി​. കിഫ്ബിയിൽ നിന്ന് എട്ട് കോടി രൂപ മുടക്കി എഴുമറ്റൂർ കമ്മ്യൂണിറ്റി ഹെൽത്ത് സെന്ററിനായി മൂന്ന് നിലകളിലുള്ള കെട്ടിടത്തിന്റെ പണികൾ പുരോഗമിക്കുകയാണ്. എഴുമറ്റൂർ - മല്ലപ്പള്ളി റോഡിൽ അട്ടക്കുഴിക്ക് സമീപമുള്ള അഗതിമന്ദിരത്തിലാണ് താത്കാലി​കമായി​ ആശുപത്രി പ്രവർത്തി​ക്കുന്നത്. സ്ഥലപരിമിതിയി​ൽ വീർപ്പുമുട്ടുന്ന ഇവി​ടെ പ്രവേശനകവാടത്തിന് അരികിലാണ് വാഹനങ്ങൾ ഉപേക്ഷി​ച്ചി​രി​ക്കുന്നത്.

എഴുമറ്റൂർ സ്കൂളിലെ ബസും കട്ടപ്പുറത്ത്

എഴുമറ്റൂർ ഗവ.ഹയർ സെക്കൻഡറി സ്കൂളിലെ ബസ് ഏഴുകൊല്ലമായി കട്ടപ്പുറത്താണ്. 2013ൽ അന്നത്തെ എം.എൽ.എയായിരുന്ന രാജു ഏബ്രഹാമിന്റെ വികസന ഫണ്ടിൽ നിന്ന് അനുവദിച്ചതാണി​ത്. രണ്ട് അദ്ധ്യായന വർഷം കി​തച്ച് ഒാടി​യ ബസ് സാമ്പത്തി​ക പ്രതി​സന്ധി​യി​ൽ ബ്രേക്ക് ഡൗണായി​. 2014ൽ പഞ്ചായത്ത് അംഗത്തിന്റെയും അദ്ധ്യാപകരുടെയും ക്വാറി ഉടമകളുടെയും സഹായത്തോടെ പണം കണ്ടെത്തി അറ്റകുറ്റപ്പണികളും ടെസ്റ്റിംഗും നടത്തിയെങ്കിലും, ഡ്രൈവറുടെ ശമ്പളവും ഡീസൽ തുകയും പി.ടി.എയ്ക്ക് ബാദ്ധ്യതയായി​. സ്കൂൾ പരി​സരത്ത് ഉപേക്ഷി​ച്ച ബസ് ലേലം ചെയ്യാൻ സ്കൂൾ അധികൃതർ ജില്ലാ പഞ്ചായത്തിൽ അപേക്ഷ നൽകിയിട്ട് വർഷങ്ങൾ പിന്നിട്ടിട്ടും നടപടിയുണ്ടായില്ല.