തിരുവല്ല : ജാതിചിന്ത മറ്റെന്നത്തേക്കാളും വളരെ കൂടിയൊരു കാലഘട്ടമായി ഇന്ന് മാറിയെന്ന് എസ്.എൻ.ഡി.പിയോഗം ജനറൽസെക്രട്ടറി വെള്ളാപ്പള്ളി നടേശൻ പറഞ്ഞു. എസ്.എൻ.ഡി.പിയോഗം തിരുവല്ല യൂണിയന്റെ ആഭിമുഖ്യത്തിലുള്ള 15-ാമത് മനയ്ക്കച്ചിറ ശ്രീനാരായണ കൺവെൻഷന്റെ ഉദ്ഘാടനം നിർവഹിക്കുകയായിരുന്നു അദ്ദേഹം. ഇന്ത്യയിൽ ഉൾപ്പെടെ ലോകത്തിന്റെ പലഭാഗത്തും ജാതിയുടെയും മതത്തിന്റെയും പേരിൽ യുദ്ധങ്ങൾ വരെ നടക്കുന്നു. ചില മതങ്ങളിൽ വിദ്വേഷം മാത്രമേയുള്ളൂ. തന്റെ മതം മാത്രം മതിയെന്നും മറ്റുള്ള മതങ്ങൾ വേണ്ടെന്നും മാത്രമല്ല, അതിന്റെ പേരിൽ കൊള്ളയും കൊലയും വരെ നടത്തുന്നു. ജാതിയും മതവുമില്ലെന്ന് പറയുന്നവരും തിരഞ്ഞെടുപ്പിൽ ജാതിയും മതവും മാത്രം നോക്കിയാണ് സ്ഥാനാർത്ഥിയെ തീരുമാനിക്കുന്നത്. സ്വാതന്ത്ര്യം കിട്ടിയ കാലത്ത് സ്ഥാനാർത്ഥിയുടെ പേരോ ജാതിയോ നോക്കാതെ ആനപ്പെട്ടി, കുതിരപ്പെട്ടി, രാഷ്ട്രീയ പാർട്ടികളുടെ പേരുമൊക്കെ പറഞ്ഞാണ് വോട്ട് തേടിയിരുന്നത്. എന്നാലിപ്പോൾ സ്ഥാനാർത്ഥി ഏത് ജാതിയാണെന്ന് നോക്കി മാത്രമേ വോട്ടുചെയ്യൂ എന്ന നിലപാടാണ് ചിലർ പുലർത്തുന്നത്. ഈഴവ സമുദായംഗങ്ങൾ ഏറെയുണ്ടെങ്കിലും രാഷ്ട്രീയ പാർട്ടികൾ വേണ്ടത്ര പരിഗണന നൽക്കാറില്ല. ആനയുടെ വിലയറിയാതെ ആനക്കാരനാൽ നയിക്കപ്പെടുന്ന വിഭാഗമായി ഭൂരിപക്ഷ സമുദായങ്ങൾ മാറി. ജാതിയുടെ പേരിൽ രൂപംകൊണ്ട രാഷ്ട്രീയ പാർട്ടികളുടെ മന്ത്രിമാരുടെ പേഴ്‌സണൽ സ്റ്റാഫുകളിൽ അവരുടെ ജാതിക്കാർ മാത്രമേ കാണാറുള്ളൂ. ആത്മീയതയിൽ നിലനിന്നുകൊണ്ട് ഭൗതികവളർച്ച നേടിയെടുക്കണം. ജാതിഭേദം മതദ്വേഷം ഏതുമില്ലാതെ സർവരും എന്ന് ഗുരു പറഞ്ഞത് എല്ലാവരോടുമാണ്. ഈഴവർ മാത്രം ജാതി പറയരുതെന്നല്ല അതിന്റെ അർത്ഥം. ജാതിവ്യവസ്ഥ നിലനിൽക്കുമ്പോൾ ജാതി പറയേണ്ടിവരും. എന്നാൽ ജാതിയുടെ പേരിൽ വിദ്വേഷം പാടില്ലെന്നും അദ്ദേഹം പറഞ്ഞു. യൂണിയൻ പ്രസിഡന്റ് ബിജു ഇരവിപേരൂർ അദ്ധ്യക്ഷത വഹിച്ചു. കോടുകുളഞ്ഞി വിശ്വധർമ്മമഠം മഠാധിപതി സ്വാമി ശിവബോധാനന്ദ അനുഗ്രഹപ്രഭാഷണം നടത്തി. യൂണിയൻ സെക്രട്ടറി അനിൽ എസ്.ഉഴത്തിൽ സ്വാഗതം പറഞ്ഞു. അഡ്വ.കെ.യു.ജനീഷ് കുമാർ എം.എൽ.എ സന്ദേശം നൽകി. രാജ്യസഭാ മുൻ ഉപാദ്ധ്യക്ഷൻ പ്രൊഫ.പി.ജെ.കുര്യൻ വിശിഷ്ടാതിഥിയായി. യു.ഡി.എഫ് സ്ഥാനാർത്ഥി ആന്റോ ആന്റണി എം.പി, എൽ.ഡി.എഫ് സ്ഥാനാർത്ഥി ഡോ.ടി.എം.തോമസ് ഐസക്, എസ്.എൻ.ഡി.പി യോഗം അസി.സെക്രട്ടറി പി.എസ്.വിജയൻ, ഇൻസ്‌പെക്ടിംഗ് ഓഫീസർ എസ്.രവീന്ദ്രൻ, ഡി.സി.സി പ്രസിഡന്റ് പ്രൊഫ.സതീഷ് കൊച്ചുപറമ്പിൽ,സി.പി.എം. ജില്ലാസെക്രട്ടറി കെ.പി.ഉദയഭാനു, ഗ്രന്ഥശാലാസംഘം വൈസ് പ്രസിഡന്റ് എ.പി.ജയൻ, കവിയൂർ പഞ്ചായത്ത് പ്രസിഡന്റ് എം.ഡി.ദിനേശ്കുമാർ, കുറ്റൂർ പഞ്ചായത്ത് പ്രസിഡന്റ് അനുരാധ സുരേഷ്, യൂണിയൻ വൈസ് പ്രസിഡന്റ് കെ.ജി.ബിജു, കൗൺസിലർമാരായ ബിജു മേത്താനം, രാജേഷ്‌കുമാർ ആർ, അനിൽ ചക്രപാണി, സരസൻ ടി.ജെ, മനോജ് ഗോപാൽ,പ്രസന്നകുമാർ,പഞ്ചായത്ത് കമ്മിറ്റിയംഗങ്ങളായ കെ.കെ.രവി, കെ.എൻ.രവീന്ദ്രൻ, വനിതാസംഘം പ്രസിഡന്റ് സുമ സജികുമാർ, സെക്രട്ടറി മണിയമ്മ സോമശേഖരൻ, കുമാരിസംഘം കോർഡിനേറ്റർ ശോഭാ ശശിധരൻ, കോഴഞ്ചേരി യൂണിയൻ പ്രസിഡന്റ് മോഹൻ ബാബു, സംസ്ഥാന കോ ഓപ്പറേറ്റിവ് വെൽഫെയർ ബോർഡ് വൈസ് ചെയർമാൻ അഡ്വ.ആർ.സനൽകുമാർ, താലൂക്ക് ലൈബ്രറി കൗൺസിൽ പ്രസിഡന്റ് അഡ്വ.ഫ്രാൻസിസ് വി.ആന്റണി, പുളിക്കീഴ് ബ്ലോക്ക് മുൻ പ്രസിഡന്റ് ഈപ്പൻ കുര്യൻ എന്നിവർ പ്രസംഗിച്ചു. ഉച്ചയ്ക്കുശേഷം യൂത്ത്മൂവ്‌മെന്റ് കേന്ദ്രസമിതി അംഗം ബിബിൻഷാൻ പ്രഭാഷണം നടത്തി.