കുന്നത്തൂർ: 2025ൽ ഇറ്റലിയിലെ ടൊറിനോയിൽ നടക്കുന്ന ലോക സ്പെഷ്യൽ ഒളിമ്പിക്സിൽ പങ്കെടുക്കേണ്ട കേരള ടീമിനെ തിരഞ്ഞെടുക്കുന്നതിനുള്ള അത്‌ലറ്റിക്സ് സെലക്ഷൻ ക്യാമ്പ്‌ ശാസ്താംകോട്ട ദേവസ്വം ബോർഡ് കോളേജ് ഗ്രൗണ്ടിൽ ആരംഭിച്ചു.

കേരളത്തിലെ എല്ലാ ജില്ലകളിൽ നിന്നും തിരഞ്ഞെടുക്കപ്പെട്ട 176 കായികതാരങ്ങൾ ക്യാമ്പിൽ പങ്കെടുക്കുന്നുണ്ട്. റോട്ടറി ഡിസ്ട്രിക്ട് 3211, ബ്രൂക്ക് ഇന്റർനാഷണൽ സ്കൂൾ, ആസ്റ്റർ പി.എം.എഫ് ഹോസ്പിറ്റൽ, വ്യാപാരി വ്യവസായി ഏകോപന സമിതി എന്നിവരുടെ സഹായത്തോടെ ശാസ്താംകോട്ട മനോവികാസാണ് കായികമേള സംഘടിപ്പിക്കുന്നത്.

റോട്ടറി ഡിസ്ട്രിക്‌ട് ഗവർണർ ഡോ. ജി.സുമിത്രൻ ഉദ്ഘാടനം ചെയ്തു. മനോവികാസ് ചെയർമാൻ ഡി.ജേക്കബ്, ശ്രീവള്ളി, പുത്തൂർ റോട്ടറി ക്ലബ് ഭാരവാഹികളായ മുരുകദാസൻ, വേലായുധൻ, മാർട്ടിൻ ഗിൽബർട്ട്, സജിത്ത് കുമാർ, ഏലിയാമ്മ ജോൺ എന്നിവർ സംസാരിച്ചു.