കരുനാഗപ്പള്ളി : ആൾതാമസം ഇല്ലാത്ത വീടിന്റെ കുളിമുറിയിൽ നിന്ന് ഗ്രോബാഗിൽ നട്ടുവളർത്തിയ രണ്ട് കഞ്ചാവ് ചെടികൾ എക്സൈസ് അധികൃതർ കണ്ടെടുത്തു. എക്സൈസ് റേഞ്ച് ഇൻസ്പെക്ടർ എൻ. ബാബുവിന്റെ നേതൃത്വത്തിൽ ആദിനാട് വടക്ക് ഭാഗത്ത് നടത്തിയ പരിശോധനയിലാണ് 20 സെന്റീമീറ്റർ വീതം നീളമുള്ളതും നിറയെ ഇലകളുമുള്ള രണ്ട് കഞ്ചാവ് ചെടികൾ കണ്ടെടുത്തത്. ആദിനാട് വടക്ക് തയ്യിൽ ക്ഷേത്രത്തിന് സമീപമുള്ള നിലം പതിക്കാറായ വീടിനുള്ളിലെ കുളിമുറിയിലാണ് കഞ്ചാവ് ചെടി വളർത്തിയിരുന്നത്. പ്രതിയെ കുറിച്ചുള്ള അന്വേഷണം ആരംഭിച്ചു. അസിസ്റ്റന്റ് എക്സൈസ് ഇൻസ്പെക്ടർമാരായ പി.എൽ.വിജിലാൽ, പി എ.അജയകുമാർ, പ്രിവന്റീവ് ഓഫീസർമാരായ വൈ. സജികുമാർ, ബി.സന്തോഷ്, സിവിൽ എക്സൈസ് ഓഫീസർമാരായ ജിനു തങ്കച്ചൻ, ഹരികൃഷ്ണൻ, ചാൾസ് എന്നിവർ പങ്കെടുത്തു.