കരുനാഗപ്പള്ളി : ജില്ലാ ലൈബ്രറി കൗൺസിൽ സംഘടിപ്പിച്ച വികസന വിജ്ഞാന സദസ് കരുനാഗപ്പള്ളി താലൂക്ക് ലൈബ്രറി കൗൺസിലിന്റെ നേതൃത്വത്തിൽ കരുനാഗപ്പള്ളി കെ.സി സെന്ററിലെ ഗ്രാസ് ഹോപ്പർ ഗ്രാൻഡ് മസ്കറ്റ് ഹാളിൽ നടന്നു. പരിപാടി മുൻ എം.പി പി.രാജേന്ദ്രൻ ഉദ്ഘാടനം ചെയ്തു. മുൻമന്ത്രി മുല്ലക്കര രത്നാകരൻ മുഖ്യപ്രഭാഷണം നടത്തി. ജില്ലാ ലൈബ്രറി കൗൺസിൽ പ്രസിഡന്റ് കെ.ബി.മുരളീകൃഷ്ണൻ അദ്ധ്യക്ഷനായി. ജില്ലാ കൗൺസിൽ സെക്രട്ടറി ഡി.സുകേശൻ ആമുഖ പ്രഭാഷണം നടത്തി. ജില്ലാ ലൈബ്രറി കൗൺസിൽ എക്സിക്യുട്ടീവ് കമ്മിറ്റിയംഗം വി.പി.ജയപ്രകാശ് മേനോൻ ഹൃദയോത്സവം കാമ്പയിൻ അവലോകനം ചെയ്തു. ഗ്രന്ഥശാലകൾ തയ്യാറാക്കിയ ചരിത്ര രചന പുള്ളിമാൻ ഗ്രന്ഥശാല ഭാരവാഹികളിൽ നിന്ന് ഡോ.വള്ളിക്കാവ് മോഹൻദാസ് ഏറ്റുവാങ്ങി. താലൂക്ക് ലൈബ്രറി കൗൺസിലിന്റെ വിഷൻ 2025 പ്രവർത്തന പത്രിക പി .രാജേന്ദ്രൻ പ്രകാശനം ചെയ്തു. താലൂക്ക് കൗൺസിൽ പ്രസിഡന്റ് അഡ്വ.പി. ബി. ശിവൻ പരിപാടികൾ ക്രോഡീകരിച്ചു. എൻ.സി.ഡി.സി അവാർഡ് നേടിയ എൻ.എസ് സഹകരണ ആശുപത്രിയുടെ പ്രസിഡന്റ് പി.രാജേന്ദ്രനെ ലൈബ്രറി പ്രവർത്തക സഹകരണസംഘാടനത്തിന് വേണ്ടി ഉപഹാരം നൽകി ആദരിച്ചു.താലൂക്ക് ലൈബ്രറി കൗൺസിൽ സെക്രട്ടറി വി.വിജയകുമാർ സ്വാഗതവും . സംസ്ഥാന കൗൺസിൽ അംഗം എ.പ്രദീപ് നന്ദിയും പറഞ്ഞു. താലൂക്കിലെ മുഴുവൻ ഗ്രന്ഥശാലകളിൽ നിന്ന് രജിസ്റ്റർ ചെയ്ത 300 പ്രതിനിധികൾ പങ്കെടുത്തു.