കൊല്ലം: ജലാശയങ്ങൾ കണ്ട് ആവേശത്തോടെ കുളി​ക്കാനി​റങ്ങി​ ജീവൻ നഷ്ടപ്പെട്ടവരുടെ എണ്ണം ജി​ല്ലയി​ൽ ഈ വർഷം ഇതുവരെ 24 ആയി​. കഴിഞ്ഞവർഷം 77 പേർ മുങ്ങി മരിച്ചെന്നാണ് ഔദ്യോഗിക കണക്ക്. മുങ്ങിമരണങ്ങൾ സംബന്ധിച്ച് ഫയർഫോഴ്സ് തയ്യാറാക്കി​യ കണക്കനുസരി​ച്ച് സംസ്ഥാനത്ത് ആറാം സ്ഥാനത്തുണ്ട് കൊല്ലം.

പരവൂർ പൊഴിക്കരയിൽ ഒഴുക്കിൽപ്പെട്ട വിദ്യാർത്ഥികളെ രക്ഷിക്കാൻ ശ്രമിക്കുന്നതിനിടെ പുനലൂർ കാഞ്ഞിരമല സ്വദേശിയായ യുവാവ് മുങ്ങിമരിച്ചത് കഴിഞ്ഞ 19നാണ്. വേനലായതി​നാൽ വെള്ളം കുറവാണെന്ന് കരുതിയാണ് നീന്തൽ വശമില്ലാത്തവർ ഉൾപ്പെടെ ജലാശയങ്ങളിൽ ഇറങ്ങുന്നത്. രക്ഷപ്പെടുത്താൻ ഇറങ്ങുന്നവരും അപകടത്തിൽപ്പെടുന്നത് പതിവാണ്. ഇങ്ങനെ പെടുന്നതിൽ ഭൂരിഭാഗവും കുട്ടികളാണ്. ജില്ലയിൽ അപകടത്തിൽപ്പെടുന്നവരിൽ അധികവും വിദ്യാർത്ഥികളും യുവാക്കളുമാണ്. ജലാശയങ്ങളുടെ സ്വഭാവമറിയാതെയുള്ള എടുത്തുചാട്ടങ്ങളാണ് അപകടപ്പെടുത്തുന്നത്.

ശ്രദ്ധി​ച്ചാൽ തടയാം മുങ്ങി​മരണങ്ങൾ
 കുട്ടികൾക്ക് സ്കൂളുകളിൽ നീന്തൽ പരിശീലനം ഏർപ്പെടുത്തണം

 പ്രാഥമിക ശുശ്രൂഷ പരിശീലനം നൽകണം

 മുതിർന്നവരില്ലാതെ കുട്ടികളെ വെള്ളത്തിൽ നീന്താനോ, കുളിക്കാനോ, കളിക്കാനോ അനുവദിക്കരുത്

 ജലാശയങ്ങളിൽ ഇറങ്ങുമ്പോൾ പാലിക്കേണ്ട മുൻകരുതലുകളെ പറ്റി ബോധവത്കരണം
 അപകട സാദ്ധ്യതയുള്ള ഇടങ്ങളിൽ വേലി കെട്ടി പ്രവേശനം നിയന്ത്രിക്കണം

 പരിശീലനം ലഭിച്ചവർ മാത്രം രക്ഷാപ്രവർത്തനത്തിന് ഇറങ്ങുക

​ ​അപസ്മാരം, ശ്വാസകോശ രോഗങ്ങളുള്ളവർ ജലാശയങ്ങളിൽ ഇറങ്ങരുത്

ഫയർ ഫോഴ്സ് ഓഫീസ്, മുങ്ങിമരണം (2023, 2024)

കൊല്ലം (കടപ്പാക്കട): 3, 3

ചാമക്കട: 10,1

കുണ്ടറ: 7,1

കൊട്ടാരക്കര: 6, 3

കരുനാഗപ്പള്ളി: 9,2

പരവൂ‌ർ: 4, 4

കടയ്ക്കൽ: 3,1

ശാസ്താംകോട്ട:13, 3

ചവറ: 8,1

പത്തനാപുരം: 4, 2

പുനലൂർ: 10,3

നീന്തൽ പാഠ്യപദ്ധതിയിൽ ഉൾപ്പെടുത്തണമെന്ന ആവശ്യത്തോട് സർക്കാർ മുഖംതിരിക്കുകയാണ്. ജലാശയങ്ങളിൽ ഇറങ്ങുന്നത് നിയന്ത്രിക്കാൻ മതിയായ സംവിധാനങ്ങളുമില്ല.

ഗിന്നസ് ഡോൾഫിൻ രതീഷ് , നീന്തൽ അദ്ധ്യാപകൻ, ജീവൻ രക്ഷാപ്രവർത്തകൻ

മുൻപരിചയമില്ലാത്തവർ ഒരുകാരണവശാലും ജലാശയങ്ങളിൽ ഇറങ്ങരുത്. മുന്നറിയിപ്പുകൾ അവഗണിക്കുന്നത് അപകടസാദ്ധ്യത വർദ്ധിപ്പിക്കും.

ഫയർഫോഴ്സ് ഉദ്യോഗസ്ഥർ