കരുനാഗപ്പള്ളി: മോട്ടോർ വാഹന വകുപ്പ് ഉദ്യോഗസ്ഥനെ കൈയേറ്റം ചെയ്തയാൾ പിടിയിൽ. തഴവ, കടത്തൂർ, കൊച്ചുവീട്ടിൽ, തെക്കതിൽ അബ്ദുൽ മനാഫ് ( 52 )ആണ് കരുനാഗപ്പള്ളി പൊലീസിന്റെ പിടിയിലായത്. കഴിഞ്ഞ വ്യാഴാഴ്ച പുതിയകാവ് ടി.ബി.ഹോസ്പിറ്റൽ ജംഗ്ഷനിൽ വച്ച് അബ്ദുൽ മനാഫ് ഹെൽമെറ്റ് ഇല്ലാതെ ടൂവീലർ ഓടിച്ച് പോയത് ഫോട്ടോ എടുത്തതിനെ തുടർന്ന് മോട്ടോർ വാഹന വകുപ്പ് ഉദ്യോഗസ്ഥരുടെ ഔദ്യോഗിക വാഹനം തടയുകയും ഉദ്യോഗസ്ഥനെ കൈയേറ്റം ചെയ്യുകയും ചെയ്തു. കരുനാഗപ്പള്ളി പൊലീസിൽ നൽകിയ പരാതിയെ തുടർന്ന് കേസെടുക്കുകയും പ്രതിയെ പിടികൂടുകയും ചെയ്യുകയായിരുന്നു. ഒളിവിൽ പോയ മറ്റൊരു പ്രതിക്കായി അന്വേഷണം ഊർജ്ജിതമാക്കി. സ്റ്റേഷൻ ഐ. എസ്.എച്ച്.ഓ മോഹിത്തിന്റെ നേതൃത്വത്തിൽ എസ്.ഐ മാരായ ഷിജു, ഷാജിമോൻ എസ്.സി.പി.ഓ മാരായ ഹാഷിം, മനുലാൽ, സി.പി.ഓമാരായ നൗഫൽ ജാൻ, കൃഷ്ണകുമാർ എന്നിവരടങ്ങിയ സംഘമാണ് പ്രതിയെ പിടികൂടിയത്.