വേളൂക്കര: മികവുറ്റ പ്രവർത്തനം കാഴ്ചവച്ചതിന് പഞ്ചായത്തിലെ അവിട്ടത്തൂർ സർക്കാർ ആയുർവേദ ഡിസ്‌പെൻസറിക്ക് എൻ.എ.ബി.എച്ച് അക്രഡിറ്റേഷൻ അംഗീകാരം. തിരുവനന്തപുരം ജിമ്മി ജോർജ് സ്റ്റേഡിയത്തിൽ നടന്ന ചടങ്ങിൽ ആരോഗ്യവകുപ്പ് മന്ത്രി വീണ ജോർജിൽ നിന്നും എൻ.എ.ബി.എച്ച് സർട്ടിഫിക്കറ്റ് വേളൂക്കര പഞ്ചായത്ത് പ്രസിഡന്റ് കെ.എസ്. ധനീഷ്, മെഡിക്കൽ ഓഫീസർ ഡോ. കെ.എൻ. നീലിമ, പഞ്ചായത്ത് അംഗങ്ങളായ പി.ജെ. സതീഷ്, സി.ആർ. ശ്യാംരാജ് എന്നിവർ ചേർന്ന് ഏറ്റുവാങ്ങി.
മികവുറ്റ സേവനങ്ങൾക്ക് അംഗീകാരം
ആരോഗ്യമേഖലയിലെ മികച്ച സ്ഥാപനങ്ങൾക്ക് അക്രഡിറ്റേഷൻ നൽകുന്ന ദേശീയ ഏജൻസിയാണ് എൻ.എ.ബി.എച്ച്. അടിസ്ഥാന സൗകര്യ വികസനം, രോഗി സൗഹൃദം, രോഗി സുരക്ഷ, ഔഷധ ഗുണമേന്മ, അണുബാധ നിയന്ത്രണം എന്നിവ ഉൾപ്പെടെയുള്ള മികവുറ്റ സേവനങ്ങളെ വിലയിരുത്തിയാണ് എൻ.എ.ബി.എച്ച് അംഗീകാരം നൽകിയത്. കേരള സർക്കാരിന്റെയും ദേശീയ ആയുഷ് മിഷൻ കേരളയുടെയും സഹകരണത്തോടെയാണ് ഡിസ്‌പെൻസറിയിൽ പ്രവർത്തനങ്ങൾ നടന്നത്.