തൃപ്രയാർ : മേളകളിലേക്ക് തിരഞ്ഞെടുക്കുന്ന ചലച്ചിത്രങ്ങൾ ഭൂരിഭാഗവും അതാത് നാടിന്റെ ജീവിതഗന്ധികളായ സിനിമകളാകുമെന്നതിനാൽ വിവിധ സംസ്‌കാരങ്ങളുടെ പരസ്പരമുള്ള പങ്കുവയ്ക്കലിനും വലിയ തിരിച്ചറിവുകൾ നേടുന്നതിനുമുള്ള വേദിയാകുമെന്ന് സംവിധായിക രത്തീന. തിരനോട്ടം എന്ന പേരിൽ രാമുകാര്യാട്ട് ഫിലിം സൊസൈറ്റി സംഘടിപ്പിച്ച രാജ്യാന്തര ചലച്ചിത്രമേള നാട്ടിക ജെ.കെ. സിനിമാസിൻ ഉദ്ഘാടനം ചെയ്യുകയായിരുന്നു രത്തീന. ചെയർമാൻ മോചിത മോഹനൻ അദ്ധ്യക്ഷയായി. ഐ. ഷൺമുഖദാസ് മുഖ്യപ്രഭാഷണം നടത്തി. ഫെസ്റ്റിവൽ ഡയറക്ടർ ഐ.ഡി. രഞ്ജിത്, ഐ.എഫ്.എഫ്.ടി എക്‌സിക്യൂട്ടീവ് ഡയറക്ടർ ചെറിയാൻ ജോസഫ്, കൺവീനർ ഷൈലേഷ് ദിവാകരൻ, ട്രഷറർ സലിം ഇമേജ് എന്നിവർ സംസാരിച്ചു. തുടർന്ന് ഉദ്ഘാടന ചിത്രമായ ആയിരത്തൊന്ന് നുണകൾ പ്രദർശിപ്പിച്ചു. സംവിധായകൻ ഡോ. ബിജു, നടനും നിർമ്മാതാവുമായ പ്രകാശ് ബാരെ, സംവിധായകരായ പ്രതാഭ് ജോസഫ്, പുതുമഠം ജയരാജ് എന്നിവർ വിവിധ ദിവസങ്ങളിൽ അതിഥികളായെത്തും.