ഗുരുവായൂർ: ഗുരുവായൂർ ദേവസ്വം ജ്ഞാനപ്പാന പുരസ്‌കാരം കവിയും അദ്ധ്യാപകനുമായ രാധാകൃഷ്ണൻ കാക്കശ്ശേരിക്ക്. മലയാള ഭാഷയ്ക്കും ഭക്തി സാഹിത്യത്തിനും ആത്മീയ പരിപോഷണത്തിനും നൽകിയ സമഗ്ര സംഭാവനയ്ക്കാണ് പുരസ്‌കാരം. 50,001 രൂപയും ശ്രീ ഗുരുവായൂരപ്പന്റെ ചിത്രം ആലേഖനം ചെയ്ത പത്തു ഗ്രാം സ്വർണ്ണപ്പതക്കവും പ്രശസ്തിപത്രവും ഫലകവും അടങ്ങുന്നതാണ് പുരസ്‌കാരം.
പൂന്താനത്തിന്റെ ജന്മദിനമായ കുംഭത്തിലെ അശ്വതിനാളായ 13ന് വൈകിട്ട് അഞ്ചിന് മേൽപ്പത്തൂർ ആഡിറ്റോറിയത്തിൽ ചേരുന്ന സാംസ്‌കാരിക സമ്മേളനത്തിൽ പുരസ്‌കാരം സമ്മാനിക്കും. ഡോ. വി.കെ. വിജയൻ, കെ.വി. രാമകൃഷ്ണൻ, ഡോ. ആർ. ശ്രീലത വർമ്മ, മല്ലിശ്ശേരി പരമേശ്വരൻ നമ്പൂതിരിപ്പാട് എന്നിവർ ഉൾപ്പെട്ട പുരസ്‌കാര നിർണയ സമിതിയാണ് ജേതാവിനെ തെരഞ്ഞെടുത്തത്.
ഇന്നലെ ചേർന്ന ദേവസ്വം ഭരണസമിതി യോഗം ശുപാർശ ഏകകണ്ഠമായി അംഗീകരിക്കുകയായിരുന്നു. യോഗത്തിൽ ദേവസ്വം ചെയർമാൻ ഡോ. വി.കെ. വിജയൻ അദ്ധ്യക്ഷനായി. ഭരണ സമിതി അംഗങ്ങളായ മല്ലിശ്ശേരി പരമേശ്വരൻ നമ്പൂതിരിപ്പാട്, പി.സി. ദിനേശൻ നമ്പൂതിരിപ്പാട്, സി. മനോജ്, ചെങ്ങറ സുരേന്ദ്രൻ, കെ.ആർ. ഗോപിനാഥ്, മനോജ് ബി. നായർ, വി.ജി. രവീന്ദ്രൻ, അഡ്മിനിസ്‌ട്രേറ്റർ കെ.പി. വിനയൻ എന്നിവർ യോഗത്തിൽ സന്നിഹിതരായി.