ഗുരുവായൂർ: ഗുരുവായൂർ ദേവസ്വത്തിന്റെ 450 കോടിയുടെ ബാങ്ക് നിക്ഷേപം കാണാനില്ലെന്ന ഓൺലൈൻ മാദ്ധ്യമങ്ങളിലെ പ്രചാരണം അസംബന്ധവും സത്യവിരുദ്ധവുമാണെന്ന് ദേവസ്വം ചെയർമാൻ ഡോ.വി.കെ.വിജയൻ പറഞ്ഞു. ദേവസ്വത്തെ അപകീർത്തിപ്പെടുത്തുന്നവർക്കെതിരെ നിയമ നടപടി സ്വീകരിക്കും. ദേവസ്വത്തിന്റെ നിക്ഷേപത്തിൽ ഒരു പൈസ പോലും നഷ്ടപ്പെട്ടിട്ടില്ല. ദേവസ്വം ആക്ട് പ്രകാരം നിയമാനുസൃതമായ ബാങ്കിൽ മാത്രമാണ് സ്ഥിര നിക്ഷേപം നടത്തിയിട്ടുള്ളത്. നിക്ഷേപ സുരക്ഷിതത്വം ഉറപ്പു നൽകുന്ന ബാങ്കുമാണിത്. ഒരു ഓൺലൈൻ മാദ്ധ്യമം നട്ടാൽ കുരുക്കാത്ത നുണ സമൂഹമാദ്ധ്യമങ്ങൾ വഴി പ്രചരിപ്പിക്കുകയാണ്. ഇതിലൂടെ ഭക്തരിൽ വിദ്വേഷം പരത്താനുള്ള ശ്രമം അത്യന്തം നീചവും അപലപനീയവുമാണെന്നും ചെയർമാൻ പറഞ്ഞു.