ചെന്ത്രാപ്പിന്നി : എടത്തിരുത്തിയിൽ കുട്ടിക്കർഷകയുടെ നേതൃത്വത്തിൽ നടത്തിയ പച്ചക്കറിക്കൃഷിയിൽ നൂറുമേനി വിളവ്. പള്ളിപ്പറമ്പിൽ സിദ്ധിഖ്-നൂർജഹാൻ ദമ്പതികളുടെ മകളും ചെന്ത്രാപ്പിന്നി ഹയർ സെക്കൻഡറി സ്‌കൂളിലെ പത്താം ക്ലാസ് വിദ്യാർത്ഥിനിയുമായ സന ഫാത്തിമയാണ് പച്ചക്കറിക്കൃഷിയിൽ മികച്ച വിജയം കൈവരിച്ചത്. എടത്തിരുത്തി മുനയത്ത് സ്വകാര്യ വ്യക്തിയുടെ രണ്ടരയേക്കറോളം സ്ഥലത്താണ് വിവിധയിനം പച്ചക്കറികൾ സനയുടെ നേതൃത്വത്തിൽ കൃഷി ചെയ്തത്. ചീര, പടവലം, വെണ്ട, വഴുതന, ചുരക്ക, വെള്ളരി, കയ്പ തുടങ്ങിയവയാണ് കൃഷി ചെയ്തത്. ജൈവരീതിയിൽ നടത്തിയ കൃഷിയിൽ മികച്ച വിളവാണ് ലഭിച്ചത്. ഓണവിപണി ലക്ഷ്യമിട്ട് അഞ്ഞൂറോളം നേന്ത്ര വാഴയും ഇവിടെ കൃഷി ചെയ്തു വരുന്നുണ്ട്. ചെന്ത്രാപ്പിന്നി ഹയർ സെക്കൻഡറി സ്‌കൂളിലെ പ്രധാനദ്ധ്യാപകൻ കെ.എസ്. കിരൺ, പി.ടി.എ പ്രസിഡന്റ് വി.കെ. ജ്യോതിപ്രകാശ്, അദ്ധ്യാപകരായ ടി.ബി. സതി, ടി.എൻ. അജയകുമാർ എന്നിവർ ചേർന്ന് വിളവെടുപ്പ് നടത്തി.