തിരുവനന്തപുരം: ഇന്ന് ആരംഭിക്കുന്ന എസ്.എസ്.എൽ.സി പരീക്ഷയ്ക്കായി ജില്ലയിലെ സ്‌കൂളുകൾ പൂർണസജ്ജം. മൂന്ന് വിദ്യാഭ്യാസ ജില്ലകളിലുമായി 264 സെന്ററുകളിലായാണ് പരീക്ഷ നടക്കുക. ആകെ 50 ക്ലസ്റ്ററുകളായി തിരിച്ചാണ് ചോദ്യപേപ്പർ വിതരണം. ആറ്റിങ്ങൽ വിദ്യാഭ്യാസ ജില്ലയിൽ 85 സെന്ററുകളിലായി 18 ക്ലസ്റ്ററുകൾ, തിരുവനന്തപുരം വിദ്യാഭ്യാസ ജില്ലയിൽ 96 സെന്ററുകളിലായി 19 ക്ലസ്റ്റർ, നെയ്യാറ്റിൻകര വിദ്യാഭ്യാസ ജില്ലയിൽ 83 സെന്ററുകളിലായി 13 ക്ലസ്റ്റർ എന്നിങ്ങനെ തയ്യാറെടുപ്പുകൾ പൂർത്തിയായെന്ന് ജില്ലാ വിദ്യാഭ്യാസ ഓഫീസർ അറിയിച്ചു. ബാങ്കിലും ട്രഷറിയിലുമായാണ് ചോദ്യപേപ്പറുകൾ സൂക്ഷിക്കുന്നത്. രാവിലെ 8.30ഓടെ ചോദ്യപേപ്പർ സെന്ററുകളിലേക്ക് വിതരണം ചെയ്യുന്ന നടപടികൾ പൂർത്തീകരിക്കും.