ആറ്റിങ്ങൽ: മുദാക്കൽ പഞ്ചായത്ത് പ്രസിഡന്റ് തിരഞ്ഞെടുപ്പ് ഇന്ന് രാവിലെ 11ന് ഗ്രാമ പഞ്ചായത്ത് കോൺഫറൻസ് ഹാളിൽ നടക്കും. സി.പി.എമ്മിലെ എ.ചന്ദ്രബാബുവ് അവിശ്വാസപ്രമേയത്തിലൂടെ പുറത്താക്കപ്പെട്ടിരുന്നു. തുടർന്നാണ് തിരഞ്ഞെടുപ്പ്. ഗ്രാമ പഞ്ചായത്ത് ഭരണസമിതിയിൽ ആർക്കും ഭൂരിപക്ഷമില്ലാത്ത ഇവിടെ 6 അംഗങ്ങളുള്ള ഇടതുമുന്നണി രണ്ട് സ്വതന്ത്രരുടെ പിൻതുണയോടെ ഭരണത്തിലെത്തുകയായിരുന്നു. തിരഞ്ഞെടുപ്പുകാലത്തെ ധാരണപ്രകാരം പ്രസിഡന്റ് സ്ഥാനം മാറിക്കൊടുക്കാത്തതിൽ പ്രതിഷേധിച്ച് ഘടകകക്ഷിയായ സി.പി.ഐയിലെ പള്ളിയറ ശശി ക്ഷേമകാര്യ സ്റ്റാൻഡിംഗ് കമ്മിറ്റി സ്ഥിരം ചെയർമാൻ സ്ഥാനം രാജിവച്ചിരുന്നു. തുടർന്നു, ഗ്രാമ പഞ്ചായത്ത് വൈസ് പ്രസിഡന്റ് ശ്രീജയുമായി ചേർന്ന് കോൺഗ്രസ് അവിശ്വാസപ്രമേയം കൊണ്ടുവന്നിരുന്നു. നിലവിലെ കക്ഷിനില: ബി.ജെ.പി 7,എൽ.ഡി.എഫ് 6 , കോൺഗ്രസ് 5, സ്വതന്ത്രർ 2.